قر ۇكىمەتى پاۆلودار, ەكىباستۇز جانە اقسۋ قالالارىندا جىلۋ جەلىلەرىن سالۋعا جانە رەكونسترۋكتسيالاۋعا 9 ملرد تەڭگە ءبولدى

بۇل قالالارداعى جەلىلەردىڭ ورتاشا توزۋ كورسەتكىشى 59-90% ارالىعىندا

مەملەكەت باسشىسىنىڭ تۇرعىن ءۇي-كوممۋنالدىق ينفراقۇرىلىمدى كەشەندى جاڭعىرتۋ جونىندەگى تاپسىرمالارىن ورىنداۋ ماقساتىندا قر پرەمەر-ءمينيسترى ولجاس بەكتەنوۆ پاۆلودار, ەكىباستۇز جانە اقسۋ قالالارىندا جىلۋ جەلىلەرىن سالۋعا جانە رەكونسترۋكتسيالاۋعا ۇكىمەت رەزەرۆىنەن 9 ملرد تەڭگە ءبولۋ تۋرالى قاۋلىعا قول قويدى,-دەپ حابارلايدى Qandastar.kz

وسىلايشا, پاۆلوداردا (3,6 ملرد تەڭگە) ۇزىندىعى 2,5 شاقىرىم بولاتىن تم-13 جىلۋ ماگيسترالى سالىنادى. بۇل 41,5 مىڭ ادام تۇراتىن پاۆلوۆ – شەۆچەنكو – كاتاەۆ كوشەلەرى ورنالاسقان اۋدانداعى كوپپاتەرلى تۇرعىن ۇيلەردى تۇراقتى جىلۋمەن قامتاماسىز ەتۋگە مۇمكىندىك بەرەدى.

ەكىباستۇزدا جالپى ۇزىندىعى شامامەن 4 شاقىرىم (3,6 ملرد تەڭگە) بولاتىن تم-1 جانە تم-3 جىلۋ ماگيسترالدارىنىڭ ۋچاسكەلەرى رەكونسترۋكتسيالانادى. وسى جۇمىستىڭ ارقاسىندا جاڭا تۇرعىن ۇيلەردى, الەۋمەتتىك مەكەمەلەردى, شاعىن جانە ورتا بيزنەس نىساندارىن قوسۋ كوزدەلگەن. بۇل 2 مىڭنان استام ادامدى قامتيدى.

قالعان 1,8 ملرد تەڭگە اقسۋداعى №3,5 جانە 8 ىقشام اۋدانداردا ورنالاسقان, ۇزىندىعى 4,3 شاقىرىم بولاتىن ورامىشىلىك جىلۋ جەلىلەرىن قايتا جاڭارتۋعا اۋدارىلادى. سوڭعى 2 جىلدا اتالعان ۋچاسكەلەردە 40-تان استام اقاۋ تىركەلگەن. رەكونسترۋكتسيا جۇمىسى 1,5 مىڭنان استام جەرگىلىكتى تۇرعىندى ساپالى جىلۋمەن قامتاماسىز ەتۋگە مۇمكىندىك بەرەدى.

پاۆلودار وبلىسى اكىمدىگىنىڭ دەرەكتەرىنە سايكەس, بۇگىنگى تاڭدا پاۆلوداردا جىلۋمەن جابدىقتاۋ جەلىلەرىنىڭ ۇزىندىعى 828,1 كم (ورتاشا توزۋ – 82,8%), ەكىباستۇزدا – 422,5 كم (90,7%), اقسۋدا – 99,1 كم (59%) قۇرايدى. تەحنيكالىق تەكسەرۋ ناتيجەلەرى بويىنشا شۇعىل جۇمىستار جۇرگىزىلۋى ءتيىس, توزۋ دەڭگەيى اسا جوعارى 4 ۋچاسكە انىقتالدى.

ەستەرىڭىزگە سالا كەتەيىك, قر پرەمەر-ءمينيسترى ولجاس بەكتەنوۆ بۇعان دەيىن ەكىباستۇز جەو-سىن ودان ءارى جاڭعىرتۋعا: قازاندىق اگرەگاتتارىن كۇردەلى جوندەۋگە جانە تۇندىرىلعان سۋ ماگيسترالىن سالۋعا رەزەرۆتەن 3,4 ملرد تەڭگە ءبولۋ تۋرالى ۇكىمەت قاۋلىسىنا قول قويعان بولاتىن.

سونداي-اق الداعى جىلىتۋ ماۋسىمىنا دايىندىق اياسىندا كەنتاۋ, ريددەر جانە قىزىلوردا جىلۋ كوزدەرىن جاڭعىرتۋعا 16 ملرد تەڭگە, ريددەر جىلۋ جەلىلەرىن كۇردەلى جوندەۋگە 2,4 ملرد تەڭگەدەن استام قاراجات جانە كوكشەتاۋ قازاندىقتارىن جوندەۋگە 816 ملن تەڭگە اۋدارىلعان بولاتىن.

جىلۋ كوزدەرىن, تكش ينفراقۇرىلىمىن جاڭعىرتۋ جانە جىلىتۋ ماۋسىمىنا دايىندىق پروتسەسى قر ۇكىمەتىنىڭ باقىلاۋىندا.