قتج قارىزدى قايتارۋعا قاۋقارلى ما: مينيستر جاۋابى

ءماجىلىس كۋلۋارى اياسىندا وتكەن بريفينگتە كولىك ءمينيسترى مارات قاراباەۆ جوعارى اۋديتورلىق پالاتا توراعاسى ءاليحان سمايىلوۆتىڭ قتج قارىزى تۋرالى مالەمدەمەسىنە جاۋاپ بەردى,-دەپ حابارلايدى Qandastar.kz

ءمينيستردىڭ سوزىنشە, كومپانيا قارىزىن وتەپ, تازا تابىسقا دا شىعىپ وتىر. سونداي-اق ول كومپانيانىڭ قارىزدى قايتارا الاتىن قاۋقارى بار ەكەنىن ايتتى. «قتج قارجىسىنا سالىنعان جولداردا جۇك تاسىمالى وتەدى, كولىكتەر جۇرەدى.

كومپانيا سالعان اقىلى جولداردان تۇسكەن قاراجات ەسەبىنەن قايتارىپ وتىرادى.

قارىزدى 20-25 جىلعا الادى. كومپانيانىڭ اقشانى قايتارۋعا قابىلەتى بار. جالپى 2,7 ترلن بولسا, ءار قارىزدىڭ بەلگىلەنگەن مولشەرى بار, بىرەۋىن 25 جىلدا, ءبىرىن ءبىرىن 30 جىلدا قايتارادى. بىلتىر قتج-نىڭ 164 ملرد تەڭگە بولدى. بىلتىر تولەۋگە ءتيىس تولەيتىن قارىزدارى بار, سولاردىڭ بارلىعىن تولەگەن سوڭ, وسىنداي تابىس قالىپ وتىر. قارىزدى قاتارۋ ءۇشىن ترانزيتتىك ءتاريفتى ۇلعايتىپ وتىرمىز. قتج-نىڭ باستى تابىسى – ترانزيتتىك تابىس», – دەدى مينيستر.

سونداي-اق ول قتج-نىڭ كولەمدى قارىزدى نە ءۇشىن العانىن ءتۇسىندىرىپ بەردى. «قتج-عا مەملەكەت قارجى بەرىپ وتىرعان جوق. ءوزىنىڭ شىعىنىن شەتەلدىك نەمەسە وتاندىق بانكتەردەن نەسيە الىپ, قاجەتىنە جۇمساپ وتىر. قانداي شىعىندار ەكەنىنە توقتالسام, ۆاگوندار ساتىپ الۋ, تەمىرجول جوندەۋ, لوكوموتيۆتەر ساتىپ الۋ. جوعارى اۋديتورلىق پالاتا ايتىپ وتىرعان قتج قارىزى ۇلكەن جول قۇرىلىسى ءۇشىن الىنعان. قتج الماتىداعى اينالما جول نەمەسە مويىنتىدا ەكىنشى تەمىرجول سالدى. بۇل قۇرىلىستاردىڭ بىردە-بىرەۋىن مەملەكەت قارجىلاندىرعان جوق. قارجىنى شەتەلدىك بانكتەردەن قارىزعا الدى», – دەدى مارات قاراباەۆ.