قارجى جانە تولەمدەر
قتج مەن قوجامجاروۆتىڭ باۋىرىنىڭ ءىسى: ەكەۋدىڭ كەلىسىمى اقوردادان جەتكەن حاتتان سوڭ اشكەرە بولعان
فوتو: Dalanews.kz
قتج-نىڭ ەنشىلەسى مەن قوجامجاروۆ كومپانياسىنىڭ «سىبايلاس كەلىسىمى» اقوردادان جەتكەن حاتتان سوڭ اشكەرە بولعان, دەپ حابارلايدى qandastar.kz Nege.Aqsha-عا سىلتەپ.
وتكەن اپتادا باسەكەلەستىكتى قورعاۋ اگەنتتىگى «قازاقستان تەمىر جولى – جۇك تاسىمالى» كومپانياسى مەن مايلاۋ ماتەريالدارىن جەتكىزۋشى HILL اراسىندا باسەكەلەستىككە قارسى كەلىسىم جاسالعانىن انىقتادى. HILL كومپانياسى تانىمال بيزنەسمەن دۋلات قوجامجاروۆقا تيەسىلى.
بۇل ءىستىڭ تەرگەلۋىنە اقوردادان جىبەرىلگەن ماتەريالدار تۇرتكى بولعان.
«تەرگەۋدىڭ باستالۋىنا قازاقستان رەسپۋبليكاسى پرەزيدەنتى اكىمشىلىگىنەن 2023 جىلدىڭ 11 ناۋرىزىندا كەلىپ تۇسكەن ماتەريالدار نەگىز بولدى. اتالعان ماتەريالداردا باسەكەلەستىكتى قورعاۋ زاڭناماسىن بۇزۋ بەلگىلەرى انىق كورسەتىلگەن. اتاپ ايتقاندا, قتج جت كومپانياسى بالاما جەتكىزۋشىلەرگە ديسكريميناتسيالىق تاسىلدەردى قولدانۋ ارقىلى, HILL كومپانياسىنىڭ پايداسىنا مايلاۋ ماتەريالدارى نارىعىنداعى باسەكەلەستىكتى شەكتەيتىن جاعدايلار جاساعان», – دەلىنگەن رەداكتسيا قولىنداعى رەسمي قۇجاتتا.
2021 جىلدان 2023 جىلعا دەيىن قتج جت مەن HILL اراسىندا جالپى قۇنى 17,2 ملرد تەڭگەگە 13 كەلىسىمشارت جاسالعان. ونىڭ التاۋى ءبىر كوزدەن ساتىپ الۋ ادىسىمەن جۇزەگە اسىرىلعان.
تەرگەۋ ناتيجەسىندە قتج جت كومپانياسىنىڭ دۋلات قوجامجاروۆتىڭ بيزنەسىن لوببيلەپ, باسقا وندىرۋشىلەردىڭ, اتاپ ايتقاندا, «لۋكويل لۋبريكانتس تسەنترالنايا ازيا» جانە Evooil سەكىلدى كومپانيالاردىڭ نارىققا كىرۋىنە كەدەرگى جاساعانى راستالدى.
مىسالى, قتج جت كومپانياسى «لوكوموتيۆ قۇراستىرۋ زاۋىتى» اق-نا ارنايى حات جولداپ, زاۋىتقا HILL كومپانياسىنىڭ موتور مايىن ساتىپ الۋدى ۇسىنعان. ال وعان دەيىن زاۋىت «لۋكويل م-14د2» مايىن قولدانىپ كەلگەن ەدى. حات جولداۋعا نەگىز رەتىندە HILL كومپانياسىنىڭ قتج جت كومپانياسىنان ماي جەتكىزۋ تۋرالى كەلىسىم جاساۋعا كومەكتەسۋدى سۇراپ جازعان ءوتىنىشى الىنعان. الايدا بۇل ءوتىنىشتىڭ نەگىزسىز ەكەنى دالەلدەندى. سەبەبى تەپلوۆوز ءوندىرۋشى Wabtec Corporation اتالعان ماي تۇرلەرىن ارالاستىرىپ پايدالانۋعا رۇقسات بەرگەن.
«ءوز كەزەگىندە, HILL كومپانياسىنىڭ «لوكوموتيۆ قۇراستىرۋ زاۋىتىمەن» ماي جەتكىزۋ تۋرالى كەلىسىم جاساۋعا كومەكتەسۋىن سۇراپ, قتج جت-عا جۇگىنۋى جانە وسى ءوتىنىش نەگىزىندە قتج جت تاراپىنان حات جولدانۋى – HILL مۇددەسىنىڭ قولداۋ تاپقانىن كورسەتەدى», – دەلىنگەن رەسمي قۇجاتتا.
سونىمەن قاتار قتج جت ساتىپ الۋ پروتسەدۋرالارىن دا ءجيى وزگەرتىپ, HILL كومپانياسىنا قولايلى جاعداي جاساپ وتىرعان.
«قتج جت مەن HILL كومپانياسى اراسىنداعى باسەكەلەستىككە قارسى كەلىسىمنەن مەملەكەتكە كەلگەن شىعىننىڭ بولجامدى مولشەرى – 2,3 ملرد تەڭگە», – دەپ كورسەتىلگەن قۇجاتتا.
قوجامجاروۆتىڭ كومپانياسى قتج-نىڭ ەنشىلەس كومپانياسى شەشىمدەردى دەربەس قابىلداعانىن العا تارتىپ, تەرگەۋ قورىتىندىلارىنا قارسىلىق بىلدىرگەنىمەن, سوت باسەكەلەستىكتى قورعاۋ اگەنتتىگىنىڭ ارەكەتتەرىنەن ەشقانداي زاڭبۇزۋشىلىق تاپپاعان.
دۋلات قوجامجاروۆ – بۇرىنعى باس پروكۋرور جانە سەناتور قايرات قوجامجاروۆتىڭ تۋعان ءىنىسى. Forbes Kazakhstan جۋرنالى ونىڭ بايلىعىن 110 ملن دوللارعا باعالاپ, ەلدەگى ەڭ باي بيزنەسمەندەر تىزىمىندە 57-ورىنعا جايعاستىرعان.
