جاڭالىقتار
قتج تاعى ءبىر ايەلدەر ۆاگونىن ىسكە قوسادى
فوتو: اشىق دەرەككوز
«جولاۋشىلار تاسىمالى» اق 1 ماۋسىمنان باستاپ №614/613 «ورال–ماڭعىستاۋ» باعىتىنداعى پويىز قۇرامىندا ايەلدەر ۆاگونىن ىسكە قوسادى. وسىلايشا, جاڭا ۆاگوننىڭ قوسىلۋىمەن «ايەلدەر ۆاگونى» قىزمەتى كورسەتىلەتىن باعىتتاردىڭ جالپى سانى 12-گە جەتەدى, دەپ جازدى qandastar.kz
قازىرگى ۋاقىتتا ايەلدەر ۆاگوندارى كەلەسى باعىتتاردا جۇرەدى:
- №77/78 «الماتى – ماڭعىستاۋ»;
- №351/352 «الماتى – ماڭعىستاۋ»;
- №45/46 «پاۆلودار – تۇركىستان»;
- №37/38 «ماڭعىستاۋ – سەمەي»;
- №47/48 «اتىراۋ – استانا»;
- №33/34 «اقتوبە – الماتى»;
- №4/3 «استانا – الماتى»;
- №71/72 «استانا – شىمكەنت»;
- №354/353 «استانا – سەمەي»;
- №24/23 «اقتوبە – الماتى»;
- №25/26 «الماتى – شىمكەنت»;
- №614/613 «ورال – ماڭعىستاۋ».
ايەلدەر ۆاگونىندا بيلەتتەر تەك ايەل جولاۋشىلارعا ساتىلادى, ال قىزمەت كورسەتۋ مىندەتىن ارنايى دايىندىقتان وتكەن ايەل جولسەرىكتەر ورىندايدى. سونىمەن قاتار, بۇل ۆاگوندا جەتى جاسقا دەيىنگى ۇل بالالاردىڭ بىرگە جۇرۋىنە رۇقسات بەرىلگەن.
ايەلدەر ۆاگونىنا بيلەتتەردى ۆوكزالداعى كاسسالاردان ساتىپ الۋعا بولادى. بۇل كەزدە كاسسا قىزمەتكەرىنە ايەلدەر ۆاگونىنان ورىن تاڭداعىڭىز كەلەتىنىن الدىن الا ايتۋ قاجەت. سونداي-اق بيلەتتەردى bilet.railways.kz رەسمي سايتىنان ونلاين ساتىپ الۋعا مۇمكىندىك بار. ونلاين راسىمدەۋ كەزىندە بيلەتتىڭ ايەلدەر ۆاگونىنا تيەسىلى ەكەنىن بىلدىرەتىن «ءاۆ» (ايەلدەر ۆاگونى) بەلگىسىنە نازار اۋدارۋ كەرەك.
