قۋاندىق بيشىمباەۆتىڭ سوتىنا باق وكىلدەرى نەگە تىكەلەي قاتىسپادى

بۇرىنعى ۇلتتىق ەكونوميكا ءمينيسترى قۋاندىق بيشىمباەۆقا قاتىستى ءىستىڭ الدىن الا تىڭدالىمىنا باق وكىلدەرى مەن باسقا دا ادامدار ءۇشىن شەكتەۋ قويىلدى دەگەن تۇجىرىم شىندىققا جاناسپايدى. بۇل اقپاراتتى استانا قالاسىنىڭ سوتى تاراتتى.

«الدىن الا تىڭدالىم اشىق رەجيمدە ءوتتى. زاڭناما تالاپتارىنا سايكەس, سوت پروتسەسكە قاتىسۋشىلاردىڭ (سوتتالۋشىلاردىڭ, جابىرلەنۋشىلەردىڭ, ولاردىڭ قورعاۋشىلارىنىڭ, پروكۋروردىڭ) وتىرىسقا قاتىسۋىن قامتاماسىز ەتۋگە مىندەتتى. وتىرىس وتەتىن زالعا قاتىسۋعا نيەت بىلدىرگەن بارلىق قاتىسۋشى سىيمادى. سول سەبەپتى, پروتسەسكە قاتىسۋشىلاردىڭ كوپتىگىن ەسكەرە وتىرىپ, قوسىمشا تاعى 2 زال (باق وكىلدەرى جانە باسقا دا قاتىسۋشىلار ءۇشىن) قاراستىرىلدى», — دەلىنگەن حابارلامادا.

اقپاراتتا ايتىلعانداي, زالداردا قاجەتتى جابدىق ورناتىلىپ, وتىرىس تىكەلەي ەفيردە كورسەتىلدى.

سونداي-اق, ەلوردا سوتىنان اقپاراتتى جەدەل الۋعا مۇمكىندىكتىڭ جاسالعانى ايتىلدى.

ايتا كەتەيىك, بۇگىن استانادا قۋاندىق بيشىمباەۆتىڭ ءىسى بويىنشا الدىن الا تىڭداۋ باستالدى.

سوت زالىنا جۋرناليستەر تىكەلەي قاتىسا المادى, باق وكىلدەرى ءۇشىن بولەك زالدا تىكەلەي كورسەتىلىم ۇيىمداستىرىلدى. ەكس-شەنەۋنىكتىڭ ىسىنە قاتىستى الدىن الا تىڭداۋعا 80-گە جۋىق باق وكىلى قاتىستى.

اتالعان ءىستىڭ سۋدياسى ايجان قۇلباەۆانىڭ شەشىمىمەن الدىن الا تىڭداۋدىڭ جالعاسى 12 ناۋرىز ساعات 17:00-گە بەلگىلەندى.