قۋات حاميتوۆ «بولاشاق جارى» تۋرالى ايتتى

كوللاج: turkystan.kz
قازاقستاندىق تانىمال ارالاس جەكپە-جەك شەبەرى قۋات حاميتوۆ (نايمان) الەۋمەتتىك جەلىدەگى پاراقشاسىندا جەكە ومىرىنە قاتىستى ويىمەن ءبولىستى,-دەپ حابارلايدى Qandastar.kz. 

ول سوڭعى كەزدەرى ۇيلەنۋ تۋرالى ءجيى ويلانىپ جۇرگەنىن ايتىپ, بولاشاق جارىن حيدجابتاعى قىزداردىڭ اراسىنان كورگىسى كەلەتىنىن جاسىرمادى.

«سوڭعى ۋاقىتتا ۇيلەنۋ تۋرالى ويلاپ ءجۇرمىن. ءۇمىت حيدجابتاعى ارۋلاردا. ونداي ورامالدى قىزداردى بۇرىننان ۇناتىپ كەلەمىن», – دەدى سپورتشى.

سپورتشى بۇدان بولەك, ءوزىنىڭ ءومىر سالتى مەن ۇستانىمدارى تۋرالى دا جازبا قالدىردى. ول دەنساۋلىققا زياندى ەشقانداي ادەتكە بوي الدىرماعانىن, ءومىر بويى ەڭبەك ەتىپ, بارىنە ادال جولمەن جەتكەنىن ايتتى.

«الكوگول, تەمەكى, ناسىباي, كاليان دەگەندى اۋزىما الىپ كورگەن ەمەسپىن. ەشقاشان ايەلگە قول كوتەرىپ, بالاعاتتاعان ەمەسپىن. ديپلومىمدى ءوز ەڭبەگىممەن الدىم, وقۋ وقىپ ءجۇرىپ تە جۇمىس ىستەپ, سپورتپەن شۇعىلداندىم. قازىرگى جەتىستىگىم – ماڭداي تەرىمنىڭ ارقاسى. 40-قا جۋىق كاسىبي جەكپە-جەك وتكىزدىم», – دەپ جازدى ول.

قۋات حاميتوۆتىڭ بۇل جازباسى جەلى قولدانۋشىلارى اراسىندا قىزۋ تالقىعا ءتۇسىپ, ءارتۇرلى پىكىرلەر تۋدىرىپ جاتىر.