Qubyr zaýytynda jumys isteıtin 18 jastaǵy qyzmetkerdiń qolyn stanok julyp ketken

Almatydaǵy qubyr zaýytynda jumys isteıtin 18 jastaǵy Bekjannyń qolyn stanok julyp ketken, dep habarlaıdy Qandastar.kz  31-arnanyń Informbıýro jańalyqtar qyzmetine silteme jasap. Jantúrshigerlik jaǵdaı kásiporyndaǵy beınekameraǵa túsip qalǵan.

Bekjan alǵashynda zaýytqa júk tasýshy bolyp jumysqa turǵan. Biraq qyzmetkerlerdiń biri ony apparatqa turǵyzyp qoıǵan. Tipti qaýipsizdik erejelerin de túsindirmedi deıdi bozbala. Keıin ózi esh eskertpesten basqa stanokpen jumys isteýge ketip qalyp, meni jalǵyz qaldyrdy dep otyr.

“Saıd degen aýysymnyń jetekshisi bolady. Ol apparatta jumys isteý trýba tıeýden ońaı dep turǵyzyp qoıdy. Ol kisimen birge istep jatamyz. Sosyn ol basqa apparatqa ketip qalady. Tipti maǵan “sen istemeı tura tur” dep eskertpeı, basqa apparatqa ketip qaldy”, – deıdi qolynan aıyrylǵan Bekjan.

Zaýyttyń basshylyǵy bul jóninde pikir bildirýden bas tartty. Bekjan aıtyp otyrǵan Saıd myrza da qarsy boldy, biraq keıin raıynan qaıtyp, suraǵymyzǵa jaýap berdi. Aıtýynsha, Bekjanǵa basqa stanokqa bara jatqanyn eskertken, biraq bozbala qulaq aspaǵan.

“Bekjanǵa aǵalardyń kózinshe “sen jumys istemeı, bir 20 mınýt otyra tur, men qaıtyp kelemin ekeýimiz birge bastaımyz” dep aıttym. Endi Bekjanǵa “Nege óıtip istediń, inim? Men saǵan otyra tur dep aıtpadym ba” desem, “keshirińizshi, aǵa, men oılanyp ketippin” dedi. Ony meniń jumysymdaǵylardyń bári estidi”, – deıdi kýáger Sabıdın Asanov.

Oqıǵadan keıin Bekjandy aýrýhanaǵa kásiporyn qyzmetkerleri aparǵan. Tipti julynǵan qoldy da paketke salyp alǵan. Sol sebepti Bekjannyń anasy balama medıınalyq kómek ýaqytynda kórsetilmedi dep nalıdy.

“Jedel járdem shaqyrmaı, balamdy alyp, qolyn jgýtpen baılaǵan. Qolyn paketke salyp alyp, ózderiniń mashınasymen 2 jumysshy aýrýhanaǵa apara jatqan. Sosyn jol boıyna toqtatyp qoıyp, 1 saǵattaı balady kúttirip qoıǵan. Balama eki kók jýrnaldy alyp kelip, qol qoıdyrtqan”, – deıdi jábirlenýshiniń anasy Sáýle Ýálıchaeva.

Ol uly qajetti em-domyn ala almaı qala ma dep qorqady. Sózinshe, zaýyt basshylyǵy 4 mıllıon teńge usynǵan. Alaıda balamnyń protezi 17 mıllıon teńge turady, qalǵan aqshany qaıdan alarymdy bilmeımin dep otyr.