«قۇداي ساقتاسىن». دەپۋتات ارداق نازاروۆ اەس قۇرىلىسى تۋرالى ويىن ايتتى

فوتو: اشىق دەرەككوز

ءماجىلىس دەپۋتاتى ارداق نازاروۆ قازاقستاندا اەس-ءتىڭ سالىنۋىنا قاتىستى ويىن ايتتى, – دەپ حابارلايدى qandastar.kz Dalanews.kz-كە سىلتەمە جاساپ.

نازاروۆ اەس-ءتىڭ سالىنۋىنا ماماندار جاقسى باعا بەرىپ وتىرعانىن ايتادى.

«سوعان بايلانىستى بولادى, قۇداي قالاسا. دامىعان مەملەكەت رەتىندە بولاشاقتا ءبارىبىر كەرەك بولادى», – دەيدى نازاروۆ كۋلۋاردا « ۇلىسمەديا» تىلشىسىنە بەرگەن جاۋابىندا.

دەپۋتات رەفەرەندۋمدا قالاي داۋىس بەرەتىنىن ايتتى.

«ءيا» دەپ جاۋاپ بەرەمىن. قولدايمىن. پىكىر ءار كەزدە ايتىلادى. پىشاقتىڭ ەكى تۇسى سەكىلدى, دۇرىس نە بۇرىس پىكىر بولادى. عالىمداردىڭ كوبى قولداپ جاتىر, كەيبىرەۋى قارسى شىعىپ جاتىر. ءبارىبىر ەرتە مە, كەش پە – ءبىز بۇعان كەلەمىز.  سەبەبى  مۇناي دا, كومىر دە بىتەدى», – دەيدى دەپۋتات.

نازاروۆ اەس-ءتى رەسەي سالۋى مۇمكىن دەگەن پىكىرگە قاتىستى ويىن ايتتى.

«ول جەردە ساياسي شەشىمدەر قابىلدانادى. ۋايىمداۋعا بولمايدى. اپاتتىق جاعداي كەز كەلگەن نارسەدە بولادى. قۇداي ساقتاسىن. مەنىڭ ويىم – جاقسى جاعىنان بولسا ەكەن, ەلىمىزگە پايدالى بولسا ەكەن دەيمىن», – دەيدى  ارداق نازاروۆ.

بۇعان دەيىن اەس-كە بايلانىستى ونەر يەلەرى جاپپاي پىكىر بىلدىرە باستاعان بولاتىن.

ولاردىڭ باسىم كوپشىلىگى الەمجەلىدە اتوم ەلەكتر ستانتسياسىنىڭ قۇرىلىسىنا قاتىستى ازاماتتىق ۇستانىمدارىن بىلدىرۋدە.

ماسەلەن, بۇعان دەيىن قايرات نۇرتاس شىمكەنت قالالىق شتابىندا اەس سالۋدى قولدايتىنىن جەتكىزىپ, حالىققا ۇندەۋ جاساعان ەدى. ول مەملەكەت باسشىسى قاسىم-جومارت توقاەۆتىڭ جولداۋىندا جاريالانعان جالپىحالىقتىق رەفەرەندۋمدى ماڭىزدى قادام رەتىندە قاراستىراتىنىن جانە 6 قازان كۇنى وتەتىن رەفەرەندۋمدا بەلسەندى تۇردە قاتىساتىنىن مالىمدەدى.

ال ءانشى مەرۋەرت تۇسىپباەۆا اەس قۇرىلىسىنا قارسى ەكەنىن اتاپ ءوتتى. ونىڭ ايتۋىنشا, اەس تەك ەكولوگيالىق قاۋىپ قانا ەمەس, بولاشاق ۇرپاقتىڭ دەنساۋلىعىنا دا ۇلكەن زيان اكەلۋى مۇمكىن.

“مەن بولاشاق ۇرپاقتىڭ, بالالارىنىڭ دەنساۋلىعىنا الاڭدايتىن ءاربىر ازاماتتىڭ بۇل ماسەلەگە بەي-جاي قاراماۋى ءتيىس دەپ ويلايمىن”, – دەدى ول.

سونىمەن قاتار بەلگىلى ونەر يەلەرى قۇدايبەرگەن بەكىش پەن جەڭىس ىسقاقوۆا دا وسى ماسەلە توڭىرەگىندە جەكە كوزقاراسىن بىلدىرۋدە تارتىنىپ قالمادى.

“اەس قازاقستانعا نە ءۇشىن كەرەك? ونى سالۋعا نە ءۇشىن قۇمارتىپ وتىر? مۇنىڭ استارىنا ءالى بويلاپ كورمەدىم. سوندىقتان كەرەك نەمەسە كەرەك ەمەس دەپ كەسىپ-ءپىشىپ  ايتا المايمىن. دەگەنمەن, 1986 جىلى ۋكرايناداعى چەرنوبل اپاتى ادامزات ساناسىنان ءالى وشە قويمادى. چەرنوبىلدە بولعان جاقىندارىم اپات سالدارىنان ونكولوگيالىق اۋرۋعا شالدىقتى.

وسى رەتتە بۇل ءبىر عانا بيلىكتىڭ ەمەس, بۇكىل حالىقتىڭ تالقىسىنا سۇيەنە وتىرىپ شەشەتىن ماسەلە. ەگەر اقىرى سالۋعا وقتالسا, دامىعان ءارى تاجىريبەسى مول جاپونيانىڭ ماماندارىنا سەنىم ارتقان ءجون دەپ سانايمىن. سەبەبى, جاپوندىقتار سەمەي پوليگونىن وتكەرگەن بىزبەن تاعدىرلاس حالىق بولعاندىقتان, مۇنىڭ قىر-سىرىن جاقسى بىلەدى دەپ ويلايمىن”, – دەپ جاۋاپ بەردى قۇدايبەرگەن بەكىش Nege.kz پورتالى جولداعان ساۋالعا.

جەڭىس ىسقاقوۆا دا ارىپتەسىنىڭ ءسوزىن قوستاي كەتتى. ونىڭ ايتۋىنشا, اەس قۇرىلىسىنان كەلىپ-كەتەر پايدا جوق.

“بازبىرەۋلەر اەس باسقا مەملەكەتتەردە ءبىر ەمەس, ەكەۋدەن بار دەگەندى ايتىپ جاتىر ەكەن. ءبىز بۇعان دەيىن دە اەس-ءسىز دە ءومىر ءسۇرىپ كەلگەن ەلمىز عوي. اەس بولماعاندىقتان وسىنداي تارشىلىقتا كۇن كەشىپ جاتپاعان شىعارمىز. ەكىنشىدەن, ونى سالۋ ءۇشىن قىرۋار قارجى كەتەدى. سول اقشانى وزگە ماسەلەلەردى وڭتايلى شەشۋگە نەگە سالماسقا?! ماسەلەن, جۇرتتىڭ الاتىن ايلىعى ينفلياتسيانىڭ سالدارىنان جۇمىرعا جۇعىمسىز بولىپ جاتىر. بۇل البەتتە كوپتەگەن وتباسىنىڭ تۇرمىستىق جاعدايى السىرەپ, “شىقپا, جانىم, شىقپامەن” وتىرۋىنا اكەلدى. ءبىلىمدى ءارى ساۋ ۇرپاق قالىپتاستىرۋ جولىندا ۇستازدار مەن دارىگەرلەردىڭ جالاقىسىن نەگە كوتەرمەسكە?!”, – دەيدى ونەر يەسى Nege.kz پورتالىنا بەرگەن سۇقباتىندا.

وسى تۇستا ءانشى بۇل شەشىم حالىقتىڭ كوڭىلىنە كۇدىك ۇيالاتاتىنىن العا تارتتى.