«Qudaı saqtasyn». Depýtat Ardaq Nazarov AES qurylysy týraly oıyn aıtty

Foto: ashyq derekkóz

Májilis depýtaty Ardaq Nazarov Qazaqstanda AES-tiń salynýyna qatysty oıyn aıtty, – dep habarlaıdy qandastar.kz Dalanews.kz-ke silteme jasap.

Nazarov AES-tiń salynýyna mamandar jaqsy baǵa berip otyrǵanyn aıtady.

«Soǵan baılanysty bolady, Qudaı qalasa. Damyǵan memleket retinde bolashaqta báribir kerek bolady», – deıdi Nazarov kýlýarda «Ulysmedıa» tilshisine bergen jaýabynda.

Depýtat referendýmda qalaı daýys beretinin aıtty.

«Iá» dep jaýap beremin. Qoldaımyn. Pikir ár kezde aıtylady. Pyshaqtyń eki tusy sekildi, durys ne burys pikir bolady. Ǵalymdardyń kóbi qoldap jatyr, keıbireýi qarsy shyǵyp jatyr. Báribir erte me, kesh pe – biz buǵan kelemiz.  Sebebi  munaı da, kómir de bitedi», – deıdi depýtat.

Nazarov AES-ti Reseı salýy múmkin degen pikirge qatysty oıyn aıtty.

«Ol jerde saıası sheshimder qabyldanady. Ýaıymdaýǵa bolmaıdy. Apattyq jaǵdaı kez kelgen nársede bolady. Qudaı saqtasyn. Meniń oıym – jaqsy jaǵynan bolsa eken, elimizge paıdaly bolsa eken deımin», – deıdi  Ardaq Nazarov.

Buǵan deıin AES-ke baılanysty óner ıeleri jappaı pikir bildire bastaǵan bolatyn.

Olardyń basym kópshiligi álemjelide atom elektr stanııasynyń qurylysyna qatysty azamattyq ustanymdaryn bildirýde.

Máselen, buǵan deıin Qaırat Nurtas Shymkent qalalyq shtabynda AES salýdy qoldaıtynyn jetkizip, halyqqa úndeý jasaǵan edi. Ol Memleket basshysy Qasym-Jomart Toqaevtyń Joldaýynda jarııalanǵan jalpyhalyqtyq referendýmdy mańyzdy qadam retinde qarastyratynyn jáne 6 qazan kúni ótetin referendýmda belsendi túrde qatysatynyn málimdedi.

Al ánshi Merýert Túsipbaeva AES qurylysyna qarsy ekenin atap ótti. Onyń aıtýynsha, AES tek ekologııalyq qaýip qana emes, bolashaq urpaqtyń densaýlyǵyna da úlken zııan ákelýi múmkin.

“Men bolashaq urpaqtyń, balalarynyń densaýlyǵyna alańdaıtyn árbir azamattyń bul máselege beı-jaı qaramaýy tıis dep oılaımyn”, – dedi ol.

Sonymen qatar belgili óner ıeleri Qudaıbergen Bekish pen Jeńis Ysqaqova da osy másele tóńireginde jeke kózqarasyn bildirýde tartynyp qalmady.

“AES Qazaqstanǵa ne úshin kerek? Ony salýǵa ne úshin qumartyp otyr? Munyń astaryna áli boılap kórmedim. Sondyqtan kerek nemese kerek emes dep kesip-piship  aıta almaımyn. Degenmen, 1986 jyly Ýkraınadaǵy Chernobl apaty adamzat sanasynan áli óshe qoımady. Chernobylde bolǵan jaqyndarym apat saldarynan onkologııalyq aýrýǵa shaldyqty.

Osy rette bul bir ǵana bıliktiń emes, búkil halyqtyń talqysyna súıene otyryp sheshetin másele. Eger aqyry salýǵa oqtalsa, damyǵan ári tájirıbesi mol Japonııanyń mamandaryna senim artqan jón dep sanaımyn. Sebebi, japondyqtar Semeı polıgonyn ótkergen bizben taǵdyrlas halyq bolǵandyqtan, munyń qyr-syryn jaqsy biledi dep oılaımyn”, – dep jaýap berdi Qudaıbergen Bekish Nege.kz portaly joldaǵan saýalǵa.

Jeńis Ysqaqova da áriptesiniń sózin qostaı ketti. Onyń aıtýynsha, AES qurylysynan kelip-keter paıda joq.

“Bázbireýler AES basqa memleketterde bir emes, ekeýden bar degendi aıtyp jatyr eken. Biz buǵan deıin de AES-siz de ómir súrip kelgen elmiz ǵoı. AES bolmaǵandyqtan osyndaı tarshylyqta kún keship jatpaǵan shyǵarmyz. Ekinshiden, ony salý úshin qyrýar qarjy ketedi. Sol aqshany ózge máselelerdi ońtaıly sheshýge nege salmasqa?! Máselen, jurttyń alatyn aılyǵy ınflıaııanyń saldarynan jumyrǵa juǵymsyz bolyp jatyr. Bul álbette kóptegen otbasynyń turmystyq jaǵdaıy álsirep, “shyqpa, janym, shyqpamen” otyrýyna ákeldi. Bilimdi ári saý urpaq qalyptastyrý jolynda ustazdar men dárigerlerdiń jalaqysyn nege kótermeske?!”, – deıdi óner ıesi Nege.kz portalyna bergen suqbatynda.

Osy tusta ánshi bul sheshim halyqtyń kóńiline kúdik uıalatatynyn alǵa tartty.