“قۇدام كىشى ءجۇز, قۇداعيىم اتاقتى اداي رۋىنان”. سانجار تايجان ۇيلەندى

فوتو: اشىق دەرەككوز

• بەلگىلى بيزنەسمەن ءارى ساياساتكەر مۇحتار تايجاننىڭ ۇلى سانجار تايجان ۇيلەندى, دەپ حابارلايدى Ulysmedia.kz.

بۇل تۋرالى م.تايجاننىڭ ءوزى الەۋمەتتىك جەلى ارقىلى ءسۇيىنشى حابار تاراتتى.

“بالام سانجار مەن اق كەلىنىمىز اينۇر رەسمي ۇيلەندى, دوستار! قۇدالارىمىزبەن كەلىسىمگە كەلىپ الماتىدا بىرىڭعاي قىز ۇزاتۋ مەن ۇيلەنۋ تويدى بىردەن جانە بىرىگىپ وتكىزىپ الدىق! ورتاق تويىمىز ەرەكشە تاماشا ءوتتى! بالالار ءبارىن وزدەرى-اق ۇيىمداستىردى, دەدى مۇحتار تايجان ءىnstagram جەلىسىندەگى پاراقشاسىندا.

سونداي-اق ساياساتكەر قۇداسىنىڭ كىشى ءجۇزدىڭ ءالىم رۋىنىڭ وكىلى, قۇداعيى اتاقتى اداي رۋىنىڭ قىزى ەكەنىن جازىپ, ءوزىنىڭ بۇعان ريزا ەكەنىن دە قوسا كەتكەن.

سانجار تايجان كىم?

سانجار تايجان – تانىمال ينجەنەر, ەلىمىزدەگى «100 جاڭا ەسىم» جوباسىنىڭ ءتورتىنشى كەزەڭىنىڭ جەڭىمپازى, Warwick Boring نەگىزىن قالاۋشى ءارى باس ينجەنەرى.

جاس ينجەنەر قازاقستاندىقتارعا سوناۋ 2019 جىلى يلون ماسك پەن ونىڭ HyperLoop جوباسى ءۇشىن بۇرعىلاۋ ماشيناسىنىڭ ءپروتوتيپىن قۇراستىرعان مامان رەتىندە جاقسى تانىس. ول 2021 جىلى TaiSan ستارتاپىن قۇردى. 2022 جىلدىڭ جەلتوقسانىندا TaiSan الەمدەگى ەڭ ءىرى ەلەكترلىك ۇشاقتاردى شىعاراتىن Vertical Aerospace كومپانياسىمەن اككۋمۋلياتورلىق بولىكتەردى دامىتۋعا قولداۋ كورسەتۋ تۋرالى كەلىسىمشارتقا وتىردى. بۇل نولدىك ەميسسياسىز ۇشاقتار شىعارۋدى كوزدەپ وتىرعان بريتاندىق كومپانيا.

ستارتاپ بريتاندىق ۇكىمەتتەن, قورلاردان جانە مەملەكەتتىك ورگانداردان 520 000 دوللار كولەمىندە قارجىلىق قولداۋ تاپتى. كومپانيا بىرنەشە اۆتوكولىك كومپانيالارىمەن ىنتىماقتاستىق تۋرالى مەموراندۋمدارعا قول قويدى.

2023 جىلدىڭ كۇزىندە ۇلىبريتانيانىڭ كولىك مينيسترلىگى TaiSan ستارتاپىن 67 ءوتىنىش بەرۋشىنىڭ ىشىنەن تاڭداپ, «2023 جىلدىڭ ەڭ پەرسپەكتيۆالى جوباسى» دەپ تانىدى.

سانجار تايجاننىڭ ايتۋىنشا, ول ستارتاپتى ودان ءارى دامىتىپ, قازاقستاندا جوبالارىن جۇزەگە اسىرۋدى جوسپارلاپ وتىر. ول قازاقتىڭ تۇڭعىش ەلەكتروموبيلىن جاساعىسى كەلەدى.