“Qudam Kishi júz, qudaǵıym ataqty Adaı rýynan”. Sanjar Taıjan úılendi

Foto: ashyq derekkóz

• Belgili bıznesmen ári saıasatker Muhtar Taıjannyń uly Sanjar Taıjan úılendi, dep habarlaıdy Ulysmedia.kz.

Bul týraly M.Taıjannyń ózi áleýmettik jeli arqyly súıinshi habar taratty.

“Balam Sanjar men aq kelinimiz Aınur resmı úılendi, dostar! Qudalarymyzben kelisimge kelip Almatyda biryńǵaı qyz uzatý men úılený toıdy birden jáne birigip ótkizip aldyq! Ortaq toıymyz erekshe tamasha ótti! Balalar bárin ózderi-aq uıymdastyrdy, dedi Muhtar Taıjan Instagram jelisindegi paraqshasynda.

Sondaı-aq saıasatker qudasynyń Kishi júzdiń Álim rýynyń ókili, qudaǵıy ataqty Adaı rýynyń qyzy ekenin jazyp, óziniń buǵan rıza ekenin de qosa ketken.

SANJAR TAIJAN KIM?

Sanjar Taıjan – tanymal ınjener, elimizdegi «100 jańa esim» jobasynyń tórtinshi kezeńiniń jeńimpazy, Warwick Boring negizin qalaýshy ári bas ınjeneri.

Jas ınjener qazaqstandyqtarǵa sonaý 2019 jyly Ilon Mask pen onyń HyperLoop jobasy úshin burǵylaý mashınasynyń prototıpin qurastyrǵan maman retinde jaqsy tanys. Ol 2021 jyly TaiSan startapyn qurdy. 2022 jyldyń jeltoqsanynda TaiSan álemdegi eń iri elektrlik ushaqtardy shyǵaratyn Vertical Aerospace kompanııasymen akkýmýlıatorlyq bólikterdi damytýǵa qoldaý kórsetý týraly kelisimshartqa otyrdy. Bul nóldik emıssııasyz ushaqtar shyǵarýdy kózdep otyrǵan brıtandyq kompanııa.

Startap brıtandyq Úkimetten, qorlardan jáne memlekettik organdardan 520 000 dollar kóleminde qarjylyq qoldaý tapty. Kompanııa birneshe avtokólik kompanııalarymen yntymaqtastyq týraly memorandýmdarǵa qol qoıdy.

2023 jyldyń kúzinde Ulybrıtanııanyń kólik mınıstrligi TaiSan startapyn 67 ótinish berýshiniń ishinen tańdap, «2023 jyldyń eń perspektıvaly jobasy» dep tanydy.

Sanjar Taıjannyń aıtýynsha, ol startapty odan ári damytyp, Qazaqstanda jobalaryn júzege asyrýdy josparlap otyr. Ol qazaqtyń tuńǵysh elektromobılin jasaǵysy keledi.