«كۇدىكتىنىڭ اياعى اۋىر ايەلى مەن ءۇش قىزى بار»: تۇركىستان وبلىسىنداعى اناسى مەن قىزى جاۋىزدىقپەن ولتىرىلگەن اۋىلدا تۇرعىندار باس كوتەردى

فوتو: ۆيدەودان سكرينشوت

تۇركىستان وبلىسى, كەلەس اۋدانىندا اناسى مەن قىزى ايۋاندىقپەن ولتىرىلگەن اۋىل تۇرعىندارى كۇدىكتىنىڭ تۋىستارىنىڭ ايماقتان كەتۋىن تالاپ ەتىپ, باس كوتەردى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

تۇرعىندارمەن قوسا اۋىل اكىمىنەن باستاپ, ءتارتىپ ساقشىلارى 30 جاستاعى ەر ادامنىڭ ۇيىنە بارعان. كۇدىكتىنىڭ جاقىندارى «اۋىلدان كوشىڭدەر» دەگەن تۇرعىندار تالابىنا ءۇش اپتا ۋاقىت بەرۋدى سۇراعان.

«مارقۇمنىڭ جاقىندارى دا, كۇدىكتىنىڭ تۋىستارى دا وسى اياداي اۋىلدا تۇرادى. ەرتەلى-كەش ءبىر-ءبىرىن كورۋى مۇمكىن. ەر ازاماتتار اراسىندا كەك الۋ ماقساتىندا قانتوگىس بولماسىنا كەپىلدىك جوق. سوندىقتان قاماۋداعى ادامنىڭ جاقىندارى بۇل اۋىلدان كوشسىن دەپ تالاپ ەتتىك», – دەدى مارقۇمنىڭ تۋىستارى.

اقىرىندا كۇدىكتىنىڭ وتباسى ءۇش اپتا ىشىندە اۋىلدان كوشىپ كەتۋگە ۋادە بەرگەن.

ودان بولەك ازاپپەن اجال قۇشقان زاريپا نارىمبەتوۆا مەن نۇريلا توعانبايدىڭ جاقىندارى پوليتسەيدەن قىسىم كوردىك دەپ اراشا سۇراپ جاتىر. مارقۇم 45 جاستاعى كەلىنشەكتىڭ ارتىندا قالعان قوس قىزىن اۋداندىق پوليتسيا باستىعى شاقىرىپ الىپ, اقپارات جاريالاعانى ءۇشىن ايىپپۇل سالىپ نەمەسە قاماۋعا الاتىنىن ايتىپ, قورقىتقان.

«كەلەس اۋداندىق پوليتسيا باسقارماسىنىڭ باستىعى ءوز كابينەتىنە كىرگىزىپ, سىزدەر نەگە الەۋمەتتىك جاعدايلارعا اقپارات تاراتاسىڭدار? بۇكىل جازعان, شىعارعان سوزدەرىڭىزدىڭ ءبارىن وشىرىڭىزدەر. وشىرمەسەڭىزدەر سىزدەرگە 600 مىڭ تەڭگە ايىپپۇل سالامىن. بولماسا 15 تاۋلىككە قاماۋعا دا قۇقىعىم بار دەپ قىسىم كورسەتكەن», – دەيدى ەرجان بايبولاتوۆ.