«Kúıeýi 10 ret pyshaq suqqan»: Almatyda Ál-Beıne Zarıpovanyń ólimi boıynsha sot otyrysy bastaldy

Foto: ashyq derekkóz

Almaty sotynda Ál-Beıne Zarıpovanyń ólimine qatysty atyshýly is boıynsha aldyn ala tyńdalym ótti. Bul týraly qandastar.kz Stan.kz aqparat agenttigine silteme jasap habarlaıdy.

Sot otyrysynda prokýror aıyptaý qorytyndysyn oqydy. Onyń aıtýynsha, 31 qańtarda túngi saǵat 3:30 shamasynda Sabyrjan Zarıpov Almaty áýejaıynda Dýbaıdan ushyp kelgen áıelin kútip alyp, ony úıine aparǵan.

«Úıdiń ekinshi qabatynda erli-zaıypty jynystyq qatynasqa túsken, sodan keıin Zarıpov áıelinen Dýbaıda bolǵan kezde onyń qońyraýlaryna nelikten jaýap bermegenin suraı bastady. Áıel Dýbaıda basqa jigit tapqanyn, al onymen ajyrasqysy keletinin aıtqan. Kámeletke tolmaǵan qyzy ekinshi qabatta uıyqtap jatqandyqtan, sóılesý úshin qazandyqtar ornalasqan jertólege túsip ketken. Zarıpov áıelinen “uıalmaısyń ba?” degen, áıeli jaýap qatýdyń ornyna kúlimsirep qoıǵan”, – dedi prokýror.

Osydan keıin er adam áıeline birneshe jerden pyshaq suqqan.

«Keýde tusyna pyshaq suqqannan keıin áıel jerge qulaǵan, sodan keıin Zarıpov onyń denesinen pyshaǵyn shyǵarmaı, joǵary qabatqa kóterilip ketken. Ári qaraı qamalatynyn bilip, qyzyn ápkesiniń úıine aparǵan. Al ony baǵýǵa aqsha berý úshin áıeliniń telefonynan aqsha aýdarǵan. Qyzyn oıatyp, ápkesine baryp, onyń atyna ashylǵan bank kartasyn beredi», — delingen aıyptaý qujatynda.

Zarıpov áıeliniń telefonyn paıdalanyp, ol esepshi bolyp jumys istegen JShS-niń banktik shotynan óz shotyna 4 mıllıon 700 myń teńge aýdarǵan.

Ál-Beıneniń anasy atalǵan jaıttardyń kópshiligi ótirik dep otyr. Sózinshe, “kózge shóp salý” oqıǵasyn, jynystyq qatynasqa erikti qosylǵandaryn sottalýshy oıdan shyǵaryp alǵan.

Aıyptar jarııalanǵannan keıin sottalýshynyń advokaty sýdıaǵa isti qosymsha tergeýge jiberýdi surady. Sebebi is boıynsha sot-psıhologııalyq-psıhıatrııalyq saraptamanyń qarama-qaıshy eki qorytyndysy bar. Bir tujyrymda kisi óltirý affekt kúıinde jasalǵany kórsetilse, ekinshi saraptama affekt belgileri joq degen qorytyndyǵa kelgen.

Sýdıa bul sot talqylaýynda naqtylanatynyn aıtyp, qorǵaýshynyń ótinishin qanaǵattandyrýdan bas tartty.

Sottalýshy óz isin kásibı sýdıaǵa tapsyratynyn aıtyp, alqabılerden bas tartty.

Eske salsaq, buǵan deıin Almatyda er adam áıelin 10 ret pyshaqtap, bes mıllıon teńgesin urlap, jertólege tastap ketti dep aıyptalǵanyn jazdyq. Jábirlenýshiniń jaqyndary kúdiktiniń jazadan ońaı qutylyp ketýinen qorqyp, rezonans týdyrǵysy keledi.