Kúıeýi aıaýsyz sabaıtynyn aıtqan 2 balanyń anasy: burynǵy kúıeýim balalarymdy bermeı otyr

Foto: kyn.kz

Túrkistan qalasynyń týmasy Anar Ormanova  búginde Astana qalasynyń turǵyny. Qyzylorda oblysyna turmysqa shyqqan ol eki balany dúnıege ákelgen. Búginde 8 jyl otasqan kúıeýimen zańdy túrde ajyrasqan áıel 2 balasyna qol jetkize almaı otyrǵanyn aıtyp, KYN.KZ tilshisi men zańgerlerden kómek surap otyr.

«Men 2 balamdy alsam boldy. Bar maqsatym sol. Kúıeýim sot arqyly 10 kúnge alyp ketken. Qazir balalarmen durys sóılestirmeıdi, qashan olardy maǵan Astanaǵa ákep beretinin de aıtpaıdy. Ákelýi tıis ýaqyttan 5 kún ótip ketti.  Aıtatyny: «Sen jaman anasyń. balalardyń tárbıesine qaramaısyń. Seni ana quqyǵynan aıyramyn». Onyń aqshasy bar, jaqsy advokat jaldaǵan. Sotta óz paıdasyna úkim shyǵartýǵa baryn saldy. Meniń ne aqsham joq, sotqa qatysýǵa da múmkindigim joq. Qazir  Astanada páter jaldap turamyn. Anam qasymda. Eki balama úıde otyryp qaraıdy. Men 350 myń aılyq alamyn. Qosymsha tamaq pisirip aqsha tabamyn. Al kúıeýim alıment retinde  aıyna eki balaǵa 20 myń beredi. Onymen neni tóleımin?»,-deıdi eki balasyna qol jetkize almaı otyrǵan Anar  Ormanova.

Áıel ata-enesi men kúıeýi balalardy ózderi tárbıelegisi keletinin aıtady. Biraq olardyń shyǵyndary úshin alıment mólsherin  kóbeıtýge múlde qarsy eken. Al ajyrasýǵa kúıeýimniń aıaýsyz uratyn ádeti sebep boldy dep otyr.

«Basynda enem ulynyń maǵan úılenýine qarsy boldy. Men onda bárin qoıaıyq, meni alma dep te aıttym. Kúıeýim qoımaı maǵan úılendi.  Ol kezde 18 jasta edim. Oramaldamyn. 4 márte kezdesip kelisimmen alyp qashty. Úı sharýasyna pysyq bolmadym. Kishkentaıymnan sabaq oqyp, aqsha tabý úshin bazarda jumys istep júrgenmin. Enemniń úıinde 4 túıe saýdym. Onyń shubatyn bazarǵa sattym. Úı sharýasyn barynsha istedim. Kúıeýim basynda shapalaqpen uratyn. Keshirip júreberdim. Sońǵy kezderi denemdi kógertip, sabap tastaıtyndy shyǵardy. Bir aıda 4 ret sabady. Sońynda ishimdegi 3 aılyq balam shetinedi. Sodan keıin ajyrasýǵa bel býdym. Tóbelesimizdi balalar kórip shoshıdy. Atam men enem uryp jatsa ajyratýdyń ornyna maǵan qandaı aıyp taǵatyndaryn, renishterin aıtyp, órtke maı quıatyn»,-deıdi áıel.

KYN.KZ tilshisi Anar Ormanovanyń kúıeýine habarlasyp, mán jaıǵa óz pikirin qosýdy suraǵan edi.

«Men balalardy 1 aıǵa alyp ketýge quqylymyn. Sot úkimi shyqqanda solaı aıtyldy. Anasy balalarǵa durys qaramaǵan. Balabaqshaǵa da bermegen. 5 jastaǵy bala áli durys sóılemeıdi. Árıne anasynyń kinási. Men qaıta áıelimmen qosylǵym keledi. Bárine Anardyń anasy kináli. Ol bizdi ajyrastyrǵysy keledi. Anar soǵan erip otyr»,-degendi aıtty.

Al áıelińizdi aıaýsyz uryp, ishtegi sábıdiń shetinegeni ras pa? Nege balalardyń psıhologııasyna qysym jasap jatyrsyzdar? degen suraqtarǵa múlde jaýap bergisi kelmeıtinin aıtyp, telefon tutqasyn qoıyp tastady.

Anar Ormanovaǵa qazirgi kúni zańgerdiń kómegi aýadaı qajet. О́ıtkeni ol óz quqyǵyn, zań erejelerin múlde bilmeıdi. Al anasy men ákesiniń janjalynda 2 bala  zardap shegip jatqan kórinedi. О́ıtkeni áıel kúıeýinen kelgen sońǵy vıdeony kórip túni boıy jylap shyqqan.

«Balam úıde óte jaqsy sóılesetin menimen. Endi qazir telefonmen sóılesem jaýap bermeıdi. Qashady. Olar meni ulyma jamandap, mıyn ýlap jatyr dep oılaımyn. Al kúıeýim 5 jastaǵy bala durys damymaǵan deıdi. Balany logoped-psıhologqa alyp barypty. Sol jerde úlken ulym jylap jatyr. Sony vıdeoǵa túsirip, meni aıyptap otyr. Balany ol jerge aparmas buryn sóılesip, túsindirip aıtý kerek edi. Ol sózge túsinetin bala. Bular ony qalaı bolsa solaı alyp barǵan, ol shoshyp aıqaıǵa basyp jylaǵan. Al kishi ulym 3 jasta. Ony da  Astanadan Aralǵa poıyzben alyp ketti. Jolǵa jasy kishkentaı. Mynandaı ystyqta ekeýi birden ájethanaǵa suranýy múmkin. Kúıeýim balalardy da uryp jiberetin ádeti bar. Sonyń bárine alańdap tún uıqym tynysh emes. Maǵan kómekteser zańger bolsa deımin»,-dep kózine jas aldy Anar Ormanova.