جاڭالىقتار
كۇيەۋى مەن ەنەسى ۇرىپ-سوققان 23 جاستاعى ايەل اۋرۋحانادا كوز جۇمدى
فوتو:m.fishki.net
جابىرلەنۋشى اۋىر سوققىدان كەيىن كوماعا تۇسكەن.
وزبەكستاننىڭ اققورعان اۋدانىندا كۇيەۋى مەن ەنەسى ۇرىپ-سوققان 23 جاستاعى جاس ايەل قايتىس بولدى, دەپ حابارلايدى qandastar.kz اقپارات پورتالى.
Azattyq Ryhy سايتىنىڭ مالىمەتىنشە, جابىرلەنۋشى اۋىر سوققىدان كەيىن كوماعا تۇسكەن. كەيىننەن ونىڭ كۇيەۋى پروتسەسسۋالدىق تارتىپتە قاماۋعا الىنعان.
تاشكەنت وبلىستىق ىشكى ىستەر باسقارماسىنىڭ حابارلاۋىنشا, ايەل اۋرۋحانادا مەديتسينالىق كومەككە قاراماستان كوز جۇمدى.
«جابىرلەنۋشىنىڭ كۇيەۋىنە قاتىستى قوزعالعان قىلمىستىق ءىس وزبەكستان رەسپۋبليكاسىنىڭ قىلمىستىق كودەكسىنىڭ 126-بابى 1-بولىگى 8-تارماعىنىڭ «گ» پۋنكتى بويىنشا قايتا سارالاندى. تەرگەۋ جۇمىستارى جالعاسىپ جاتىر», – دەلىنگەن حابارلامادا.
بۇل وقيعا وزبەكستان قوعامىندا ۇلكەن رەزونانس تۋعىزدى. قۇقىق قورعاۋ ورگاندارىنىڭ تەرگەۋ ناتيجەلەرى الداعى ۋاقىتتا جاريالانادى.
