«Kúıeýim de, balalarym da qaıtys boldy». Jelide temirjol vokzalyn panalap júrgen qart ana jurtty eljiretti

Foto: instagram.com/qazaq_robin_hood/

Jelide Almaty-1 temir jol vokzalyn panalap júrgen qart áıeldiń vıdeosy tarady, – dep habarlaıdy Massaget.kz tilshisi.

Vıdeony qazaqstandyq mýzykant Ilııas Sarıev áleýmettik jelidegi paraqshasynda jarııalady. Onyń aıtýynsha, Nurjan apa 69 jasta, kúıeýi, bala-shaǵasy qaıtys bolǵan. Ájeıdiń densaýlyǵy da nashar, aıaǵy men denesin belgisiz jara basypty.

«Meniń balam da, qyzym da, kúıeýim de qaıtys bolǵan. Maǵan eshnárse kerek emes», – deıdi qart ana vıdeoda.

Alaıda qart ana blogerdiń kómeginen bas tartyp otyr.

«Almaty 1 temir jol vokzalynda bir anamyz kúndelikti túnep júr. Ol kisiniń baratyn jeri, ıaǵnı baspanasy joq. Anamyzǵa kómektesý úshin arnaıy keldik, tańerteńnen beri osynda júrmiz. Biraq anamyz qorqyp qalǵan. Eki aıaǵy da jara. Omyraýynda da jara bar. Anamyz qatty qınalyp júr.

Anamyz 3 kún boldy, kómekten bas tartyp otyr. Qoldan kelgen barlyq amaldy jasadyq. Jaqyndarynan aıyrylǵan anamyzǵa bul dúnıe qyzyq bolmaı qalǵan eken. úıeýinen, perzentterinen bir ýaqytta aıyrylǵan anamyzǵa óte qıyn», – deıdi ol.

Vokzaldy panalap júrgen qar áıel tipti ákimdiktiń kómeginen de bas tartqan.

«Qurmetti qazaq eli. Kópshilik «qarttar úıine aparyńdar, kómektesińder» dep jazyp jatyr eken. Biraq, anamyz eshqaıda barmaı otyr. Kómekke ákimdikten de adamdar kelip tur, jan-jaqtan jurt kelip jatyr, meniń qolymda páterdiń kilti tur. Úıge de barmaıdy, jýyndyryp, basqa kıim alaıyq desek oǵan da kónbeıdi. Qoldan kelgenniń bárin jasap jatyrmyz, biraq anamyz kónbeı otyr. «Kelmeńder, kómekteriń kerek emes dep renjip jatyr», – deıdi ol.