Kúıeýinen zorlyq-zombylyq kórgenderge ajyrasqan soń úı beriledi

Foto:istockphoto.com

О́zbekstan Parlamentiniń joǵarǵy palatasy – Olıı Majlıs Senaty áıelder quqyǵyn qorǵaý jáne otbasy ınstıtýtyn nyǵaıtýǵa baǵyttalǵan zańdy maquldady. Bul týraly Senattyń baspasóz qyzmeti habarlady, – dep habarlaıdy  qandastar.kz

Jańa zań nekeni buzý jáne turmystyq zorlyq-zombylyqqa baılanysty turǵyn úı daýlaryn qaraý tártibine ózgerister engizedi. Qujatqa sáıkes, zorlyq-zombylyqqa ushyraǵan adam tıisti talap qoıǵan jaǵdaıda, sot taraptardyń tatýlasýy úshin zańda belgilengen merzimdi alyp tastaı alady. Bul ózgeris jábirlenýshilerdiń quqyqtaryn qorǵaý proesin jedeldetýge baǵyttalǵan.

Aikyn.kz jazǵandaı, turǵyn úı daýlaryn sheshý kezinde sot múliktiń menshik ıesin jábirlenýshige turatyn baspana usynýǵa mindetteı alady. Menshik ıesi jábirlenýshini basqa baspanaǵa kóshirýi nemese turǵyn úıdi jalǵa alý shyǵyndaryn óteýi múmkin.

Zań shyǵarýshylardyń aıtýynsha, bul qadam turmystyq zorlyq-zombylyq kórgen azamattarǵa qoldaý kórsetý tetikterin jetildirýge arnalǵan. Senattyń habarlamasynda qujattyń jábirlenýshilerdiń múddelerin qorǵaýdyń quqyqtyq negizderin nyǵaıtyp, áıelderdiń qoǵamdaǵy jaǵdaıyn jaqsartýǵa yqpal etetini atap ótildi. Zań halyqtyń osal toptary úshin qaýipsiz orta qurýǵa baǵyttalǵan memlekettik saıasat aıasynda ázirlengen.