«كۇيەۋلەرى حيدجاب كيمەگەنى ءۇشىن ايەلدەرىن ءولتىرىپ جاتىر»: ۇلانعاسىر قاميدىڭ بولاشاق جارىنا قوياتىن تالابى كوپكە ۇناماي قالدى

تانىمال حيتمەن ۇلانعاسىر قامي بولاشاق جارىنا ناماز وقىتىپ, حيدجاب كيگىزەتىنىن ايتتى. بۇل تۋرالى Stan.kz اقپارات اگەنتتىگى حابارلايدى.

25 جاستاعى جىگىتتىڭ وتباسىلىق ومىرىنە قاتىستى قاعيداسى جەلىدە قىزۋ تالقىعا ءتۇستى.

“شىن ءتۇسىنىپ كيگەن ايەل حيدجابتى باسىن كەسىپ السا دا شەشپەيدى. باسقاسىندا شارۋام جوق. مەن ەرتەڭ ءوز ايەلىمە حيدجاب كيگىزەمىن. باسقاسى شەشىپ الا ما, شەشىندىرە مە,شاتاعىم جوق. وزىمدىكىنە كيگىزەمىن. بۇعان كونەتىن ايەلدى الامىن, كونبەسە, المايمىن. ارابتىكى مە, باسقانىكى مە, ماعان ءبارىبىر. مەن ونى ءتۇسىنىپ تۇرمىن, تۇسەنەتىن ايەل ىزدەيمىن. كيمەيمىن دەسە, “ساۋ بول” دەيمىن. بولاشاق ايەلىمنىڭ سانىن جالتىراتىپ ەشقايدا شىعارعىم كەلمەيدى”, – دەدى ءانشى.

سونىمەن قاتار ونداي شەشىمگە ايەلىنە دە جاۋاپتى بولعاندىقتان بارعانىن العا تارتتى.
“نەگە حيدجاب كيگىزەسىڭ دەگەن سۇراق بولسا, ەر ادام وزىنە جاۋاپكەرشىلىك الادى عوي… ۇيلەنگەننەن كەيىن اقىرەتكە دەيىن ايەلىڭە دە سەن جاۋاپتىسىڭ, سۇرالاسىڭ. ەگەر حيدجاب كيىپ, دۇرىس جۇرمەيتىن ايەل بولسا, ۇيلەنبەي-اق قويعان دۇرىس… ايەلىن ءولتىرىپ قويدى دەگەننىڭ ءبارى حيدجاب كيمەگەننەن باستالعان شارۋا. ۇستازدار باياعىدان ايتىپ كەلە جاتىر. ايەلى سانىن جالتىراتىپ كوشەگە شىعادى, كۇيەۋى ونى ەستيدى دە, بارىپ ءولتىرىپ قويادى دەگەن سياقتى, – دەپ ايتتى حيتمەن.

جەلى قولدانۋشىلارى ونەر يەسىنىڭ پىكىرىن قىزۋ تالقىلاپ جاتىر.

“شاشىڭدى جالتىراتپاي, ەركەك بولشى اۋەلى”, “حيدجاب كيگەن قىزدى دا ولتىرگەن”, “مىناداي نادان ادامدى ساحناعا شىعارماۋ كەرەك”, “مۇسىلماندارعا ءان ايتۋ حارام ەمەس پا?”, – دەپ جازدى جەلى قولدانۋشىلارى.