“قۇلاعىڭدى كەسەمىن”: اقتوبەدە ستۋدەنتتەر مەكتەپ اۋلاسىنداعى وقۋشىلاردى پىشاقتادى دەپ ايىپتالدى

فوتو: Stan.kz

اقتوبەدە مەكتەپ اۋلاسىندا فۋتبول ويناپ جۇرگەن جوعارى سىنىپ وقۋشىلارىن كوللەدج ستۋدەنتتەرى پىشاقتاپ كەتكەن. اتا-انالار تەرگەۋ امالدارىنا كۇمان كەلتىرىپ وتىر. ايتۋلارىنشا, كۇدىكتىلەر تولىق ۇستالماعان. بۇل تۋرالى  qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

2 قازان كۇنى اقتوبە قالاسى №23 مەكتەپتىڭ اۋلاسىندا جاسوسپىرىمدەر اراسىندا توبەلەس بولدى. مەكتەپ اۋلاسىندا فۋتبول ويناپ جاتقان جوعارى سىنىپ وقۋشىلارىنا سىرتتان ستۋدەنتتەر كەلىپ تيىسكەن. اتا-انالار بولعان جايدى باياندادى.

“فۋتبول الاڭىندا 10-11-سىنىپ وقۋشىلارى بولعان. بۇلار العاشىندا ءبىر توپ بالانىڭ قاشىپ بارا جاتقانىن, ونىڭ ارتىنان تاعى ءبىر توپتىڭ قۋىپ بارا جاتقانىن كورگەنىن ايتادى. قاشقانداردى ۇستاي الماعاندار ءبىزدىڭ بالالارىمىزعا كەلىپ ۇرىنعان. “كىمسىڭدەر” دەپ تيىسكەن. بۇلار وسى مەكتەپتىڭ وقۋشىلارىمىز دەگەن ەكەن, ولار وزدەرىن “شالقارلىقپىز” دەپ تانىستىرعان. سول جەردە ءبىر بالانى شاقىرىپ الىپ وعان تيىسەدى, پىشاق كورسەتەدى. سول جەردە قۇتقارۋعا جۇگىرىپ كەلگەن مەنىڭ بالامنىڭ جامباسىنا پىشاق سۇققان. ۇلكەن قانجار پىشاق سالعان. ءۇش كۇن اۋرۋحاناعا جاتىپ شىقتى. بالام وسى ۋاقىتقا دەيىن ەمدەلدى. كەيىن بىلدىك, ولار مەكتەپتىڭ قاسىنداعى كوللەدج ستۋدەنتتەرى بولىپ شىقتى. مەكتەپ كامەراسىنا تۇسكەن. ەكى بالانى پىشاقتاپ, تاعى ءبىر بالانى سوققىعا جىعىپ تۇر. ويناپ جاتقان بالالارعا ۇرىنىپ, جاپپاي توبەلەس جاساعانداردىڭ ءبارى جاۋاپقا تارتىلۋ كەرەك”, – دەدى وقۋشىنىڭ اناسى سارا قوجانوۆا.

اتا-انالار وقيعا ورنىنا كەلىپ جاعدايدى بايانداپ بەردى. ولار بالالارىن تەپكىنىڭ استىنا العان كۇدىكتىلەر جازادان قۇتىلىپ كەتۋى مۇمكىن دەپ قاۋىپتەنەدى.

“بالام №23 مەكتەپتىڭ 11-سىنىبىندا وقيدى. سول كۇنى كەشكىلىك وسى مەكتەپ اۋلاسىنا فۋتبول ويناۋعا كەلدى. بالامنىڭ ايتۋىنشا, ءبىرىن-ءبىرى قۋىپ بارا جاتقان توپتى بۇلار ويىندارىن توقتاتىپ, قىزىقتاپ قارايدى. ولار جۇگىرىپ كەتكەن سوڭ ءارى قاراي ويناعان. كەيىن بالالار قايتىپ كەلىپ,  الاڭنىڭ سىرتىندا تۇرىپ  بۇلاردى بالاعاتتاعان. مەنىڭ بالام سول جەردە “دۇرىس سويلەيىك” دەگەن. سول كەزدە ولار فۋتبول الاڭىنىڭ ىشىنە كىرىپ “جاڭاعى سويلەپ تۇرعان كىم” دەپ بالامنىڭ قاسىنا كەلەدى. 3-4 بالا قورشاپ جەكە شىعارىپ الادى. وزدەرىن “شالقاردانبىز” دەپ ايتقان. بۇلار فۋتبول ويناپ جاتىرمىز, جوندەرىڭە كەتىڭدەر دەگەندە “قاتتى سويلەپ قوياسىڭ با” دەپ ىشىنە پىشاق تاقايدى. بىرنەشە بالا جابىلعان. باسىنا سەكىرگەن. پىشاق سەرمەپ قورقىتقان. توپ بالانىڭ اراسىندا ءۇش بالا قالىپ قويعان”, – دەيدى جابىرلەنۋشىنىڭ اناسى.

سونداي-اق ونىڭ سوزىنشە سول كۇنى بالاسى جەدەل جاردەممەن اۋرۋحاناعا جەتكىزىلگەن.

“جابىق باس مي جاراقاتى, جاق جاراقاتىن الدى. بالام ءالى تولىق جازىلعان جوق. ءبىزدىڭ الاڭدايتىنىمىز, كىنالىلەر ءالى تولىق ۇستالعان جوق. كوللەدج مەكتەپكە ءتيىپ تۇر. ءبىز قورقامىز. ولار قايتا قورقىتۋى مۇمكىن. قاي جەردەن كۇتىپ الىپ تيىسەدى دەپ قورقامىز. تەرگەۋ امالدارى جاي ءجۇرىپ جاتىر. الى بەتتەستىرۋ بولمادى. ءبىز كىنالىلەردىڭ ءبارى جاۋاپقا تارتىلۋىن سۇرايمىز. نەگە بالالار قورقىنىشتا ءجۇرۋى كەرەك? ءبىز بالالار ءۇشىن قورقامىز“, – دەدى اتا-انا اينۇر اققويشينا.

وقيعا مەكتەپ اۋلاسىندا بولسا دا, كۇزەتشى كەلمەگەن. اتا-انالار قانسىراپ كومەك سۇراعان وقۋشىنىڭ مەكتەپ ەسىگىن اشا الماي, كوشەدەن كومەك سۇراپ كەتكەنىن ايتادى.

“ولار ۇبت-عا دايىندالىپ شىققان سوڭ فۋتبول ويناپ قالعان. سىرتتان كەلگەن بالالار ۇرىپ تۇر. ءۇش دوس بالا ءبىرىن-ءبىرى قورعاعان. بالالاردىڭ ايتۋىنشا, 15 بالا كەلگەن. مەنىڭ بالامدى جابىلىپ ۇرعان, بوكسەدەن ءۇش جەردەن پىشاق سۇققان. “پىشاقپەن قۇلاعىڭدى كەسەمىن” دەپ قورقىتقان. بالام قۇلاعىن جاۋىپ جاتقان. كوزىنىڭ تۇسىنان تەۋىپ كەتىپ قالعان. كۇزەتشى ەسىك اشپاعان. قانسىراپ جولدىڭ ارعى بەتىندەگى دۇكەننەن كومەك سۇراعان پوليتسيا, 103 قىزمەتىن شاقىرعان. جاراسىن تىگىپ وتا جاسادى. ءبىز الاڭداپ وتىرمىز”, – دەدى اتا-انا شىنار بالتابەكوۆا.

اقتوبە وبلىستىق ءبىلىم باسقارماسى وقيعانىڭ بولعانىن, وقۋشىلارعا ستۋدەنتتەردىڭ تيىسكەنىن راستايدى.

“2 قازان ساعات 20.00 شاماسىندا №23 ورتا مەكتەپ-ليتسەيىنىڭ فۋتبول الاڭىندا ويناپ جۇرگەن وقۋشىلارعا ءبىر توپ ءجاسوسپىرىم كەلىپ سوقتىعىسقان. سوقتىعىسۋ ناتيجەسىندە كۇدىكتى توپ كامەلەتكە تولماعان 2 جاسوسپىرىمگە پىشاق, بىرەۋىنە  دەنە جاراقاتىن سالدى. جاراقات سالعان كۇدىكتى توپ كوللەدج ستۋدەنتتەرى ەكەنى انىقتالىپ, قازىر وقيعاعا قاتىستى تەرگەۋ امالدارى جۇرگىزىلىپ جاتىر. جابىرلەنۋشى ءبىلىم الۋشىلاردىڭ جاعدايلارى بىرقالىپتى. قازىر وقۋلارىن جالعاستىرىپ جاتىر”, – دەپ حابارلايدى اقتوبە وبلىسى ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.