“Qulaǵyńdy kesemin”: Aqtóbede stýdentter mektep aýlasyndaǵy oqýshylardy pyshaqtady dep aıyptaldy

Foto: Stan.kz

Aqtóbede mektep aýlasynda fýtbol oınap júrgen joǵary synyp oqýshylaryn kolledj stýdentteri pyshaqtap ketken. Ata-analar tergeý amaldaryna kúmán keltirip otyr. Aıtýlarynsha, kúdiktiler tolyq ustalmaǵan. Bul týraly  qandastar.kz Stan.kz aqparat agenttigine silteme jasap habarlaıdy.

2 qazan kúni Aqtóbe qalasy №23 mekteptiń aýlasynda jasóspirimder arasynda tóbeles boldy. Mektep aýlasynda fýtbol oınap jatqan joǵary synyp oqýshylaryna syrttan stýdentter kelip tıisken. Ata-analar bolǵan jaıdy baıandady.

“Fýtbol alańynda 10-11-synyp oqýshylary bolǵan. Bular alǵashynda bir top balanyń qashyp bara jatqanyn, onyń artynan taǵy bir toptyń qýyp bara jatqanyn kórgenin aıtady. Qashqandardy ustaı almaǵandar bizdiń balalarymyzǵa kelip urynǵan. “Kimsińder” dep tıisken. Bular osy mekteptiń oqýshylarymyz degen eken, olar ózderin “Shalqarlyqpyz” dep tanystyrǵan. Sol jerde bir balany shaqyryp alyp oǵan tıisedi, pyshaq kórsetedi. Sol jerde qutqarýǵa júgirip kelgen meniń balamnyń jambasyna pyshaq suqqan. Úlken qanjar pyshaq salǵan. Úsh kún aýrýhanaǵa jatyp shyqty. Balam osy ýaqytqa deıin emdeldi. Keıin bildik, olar mekteptiń qasyndaǵy kolledj stýdentteri bolyp shyqty. Mektep kamerasyna túsken. Eki balany pyshaqtap, taǵy bir balany soqqyǵa jyǵyp tur. Oınap jatqan balalarǵa urynyp, jappaı tóbeles jasaǵandardyń bári jaýapqa tartylý kerek”, – dedi oqýshynyń anasy Sara Qojanova.

Ata-analar oqıǵa ornyna kelip jaǵdaıdy baıandap berdi. Olar balalaryn tepkiniń astyna alǵan kúdiktiler jazadan qutylyp ketýi múmkin dep qaýiptenedi.

“Balam №23 mekteptiń 11-synybynda oqıdy. Sol kúni keshkilik osy mektep aýlasyna fýtbol oınaýǵa keldi. Balamnyń aıtýynsha, birin-biri qýyp bara jatqan topty bular oıyndaryn toqtatyp, qyzyqtap qaraıdy. Olar júgirip ketken soń ári qaraı oınaǵan. Keıin balalar qaıtyp kelip,  alańnyń syrtynda turyp  bulardy balaǵattaǵan. Meniń balam sol jerde “durys sóıleıik” degen. Sol kezde olar fýtbol alańynyń ishine kirip “jańaǵy sóılep turǵan kim” dep balamnyń qasyna keledi. 3-4 bala qorshap jeke shyǵaryp alady. О́zderin “Shalqardanbyz” dep aıtqan. Bular fýtbol oınap jatyrmyz, jónderińe ketińder degende “qatty sóılep qoıasyń ba” dep ishine pyshaq taqaıdy. Birneshe bala jabylǵan. Basyna sekirgen. Pyshaq sermep qorqytqan. Top balanyń arasynda úsh bala qalyp qoıǵan”, – deıdi jábirlenýshiniń anasy.

Sondaı-aq onyń sózinshe sol kúni balasy jedel járdemmen aýrýhanaǵa jetkizilgen.

“Jabyq bas mı jaraqaty, jaq jaraqatyn aldy. Balam áli tolyq jazylǵan joq. Bizdiń alańdaıtynymyz, kináliler áli tolyq ustalǵan joq. Kolledj mektepke tıip tur. Biz qorqamyz. Olar qaıta qorqytýy múmkin. Qaı jerden kútip alyp tıisedi dep qorqamyz. Tergeý amaldary jaı júrip jatyr. Áli bettestirý bolmady. Biz kinálilerdiń bári jaýapqa tartylýyn suraımyz. Nege balalar qorqynyshta júrýi kerek? Biz balalar úshin qorqamyz“, – dedi ata-ana Aınur Aqqoıshına.

Oqıǵa mektep aýlasynda bolsa da, kúzetshi kelmegen. Ata-analar qansyrap kómek suraǵan oqýshynyń mektep esigin asha almaı, kósheden kómek surap ketkenin aıtady.

“Olar UBT-ǵa daıyndalyp shyqqan soń fýtbol oınap qalǵan. Syrttan kelgen balalar uryp tur. Úsh dos bala birin-biri qorǵaǵan. Balalardyń aıtýynsha, 15 bala kelgen. Meniń balamdy jabylyp urǵan, bókseden úsh jerden pyshaq suqqan. “Pyshaqpen qulaǵyńdy kesemin” dep qorqytqan. Balam qulaǵyn jaýyp jatqan. Kóziniń tusynan teýip ketip qalǵan. Kúzetshi esik ashpaǵan. Qansyrap joldyń arǵy betindegi dúkennen kómek suraǵan Polıııa, 103 qyzmetin shaqyrǵan. Jarasyn tigip ota jasady. Biz alańdap otyrmyz”, – dedi ata-ana Shynar Baltabekova.

Aqtóbe oblystyq bilim basqarmasy oqıǵanyń bolǵanyn, oqýshylarǵa stýdentterdiń tıiskenin rastaıdy.

“2 qazan saǵat 20.00 shamasynda №23 orta mektep-lıeıiniń fýtbol alańynda oınap júrgen oqýshylarǵa bir top jasóspirim kelip soqtyǵysqan. Soqtyǵysý nátıjesinde kúdikti top kámeletke tolmaǵan 2 jasóspirimge pyshaq, bireýine  dene jaraqatyn saldy. Jaraqat salǵan kúdikti top kolledj stýdentteri ekeni anyqtalyp, qazir oqıǵaǵa qatysty tergeý amaldary júrgizilip jatyr. Jábirlenýshi bilim alýshylardyń jaǵdaılary birqalypty. Qazir oqýlaryn jalǵastyryp jatyr”, – dep habarlaıdy Aqtóbe oblysy bilim basqarmasy basshysynyń orynbasary Nurgúl Bertileýova.