«قۇلاسا, قۇلاي بەرسىن»: قاراعاندى وبلىسىندا 20-عا جۋىق وتباسى اپاتتى جاعدايداعى ۇيدەن كوشپەي وتىر

فوتو: سيۋجەت كادرلارىنان

قاراعاندى وبلىسىنىڭ ساران قالاسىندا جيىرما شاقتى وتباسى اپاتتى دەپ تانىلعان ۇيلەرىنەن شىعۋعا قارسىلىق تانىتتى, دەپ جازدى qandastar.kz

ايتۋلارىنشا, اكىمدىك بۇرىننان قۇلايىن دەپ تۇرعان عيماراتقا ەش شارا قولدانباعان. ال تۇرعىندار مەكتەپ پەن جاتاقحاناعا ورنالاسۋعا قارسى. بۇل تۋرالى Stan.kz اقپارات اگەنتتىگى 31 ارنانىڭ “ينفورمبيۋرو” جاڭالىقتار باعدارلاماسىنا سىلتەمە جاساپ حابارلايدى.

ۋاقىتشا باسپانا رەتىندە تۇرعىندارعا مەكتەپتەر نەمەسە جاتاقحانالاردان بولمەلەر ۇسىنىلعان.

«داعدارىس ورتالىعىنىڭ نە ەكەنىن تۇسىنەسىز بە? مىسالى, ينتەرنات-مەكتەپ. ءوزىم سوندا كوپ جىل جۇمىس ىستەدىم. قازىر ول جەردە بالالار تۇرادى. ينتەرنات تولىق. قالاي تاماق پىسىرەمىز, قالاي جۋىنامىز?» – دەدى ساران قالاسىنىڭ تۇرعىنى كريستينا سماگينا.

ادامدار مۇندا 20 جىلدان بەرى تۇرىپ كەلەدى. قازىر ۇيدە تەك ءتورت كىرەبەرىس قانا پايدالانىلادى. پەشپەن جىلىنادى, تۇرعىندار كومىردى قاباتتارعا وزدەرى تاسيدى. ءبىر كىرەبەرىستە بىرنەشە جىل بۇرىن پليتالار قۇلاپ, تۇرعىنداردى كوشىرۋ كەرەك بولعان. قالعاندارىنا بىلتىر ءۇيدى قالپىنا كەلتىرەمىز دەپ ۋادە بەرگەن.

ء«بىزدى تىنىش قالدىرىپ, ءۇي دايىن بولعانشا ەشكىم مازالاماۋىن تالاپ ەتەمىز. بىزگە پاتەر بەرەتىنىن ايتقان. ء“ۇي قۇلاپ كەتپەي مە دەپ قورىقپايسىز با” دەيدى. قۇلاسا, قۇلاي بەرسىن!» – دەدى ساران قالاسىنىڭ تۇرعىنى گالينا فادەەۆا.

بۇل جەردە تۇرعىندار سۋمەن جابدىقتاۋدى, كارىزدى, جارىقتى ءوز كۇشتەرىمەن قالپىنا كەلتىرگەن. ولاردىڭ ايتۋىنشا, ماسەلە 5 جىلدان بەرى شەشىلمەي كەلەدى. ءتىپتى جەرتولە سۋعا تولىپ تۇرعاندا دا ەشكىم نازار اۋدارماعان. ال تۇرعىندار جىلۋ تارتقالى جاتقاندا, اكىمدىك ساراپتاما جاساپ, ءۇي اپاتتى جاعدايدا ەكەنىن انىقتادى.

قالا اكىمى ۇيدە تىرەك كونسترۋكتسيالارى بۇزىلعانىن, كەز كەلگەن ساتتە قۇلاپ كەتۋى مۇمكىن ەكەنىن ايتتى. تۇرعىندارعا الدىمەن ءۇيدىڭ اپاتتى ەكەنىن راستايتىن قاۋلى الىپ, تۇرعىن ءۇي كەزەگىنە تۇرۋ كەرەك.

«بارلىق تۇرعىن ءۇشىن باسپانا قاراستىرىلعان. تەك پروتسەدۋرادان ءوتۋ كەرەك. ءبىز كەزەكتە تۇرعان باسقا ازاماتتاردىڭ قۇقىعىن بۇزا وتىرىپ, بىردەن پاتەر بەرە المايمىز. كىم تەزىرەك كەلىپ, قۇجاتتارىن تاپسىرسا, ءبارى زاڭ شەڭبەرىندە 2 اي ىشىندە شەشىلەدى», – دەدى ساران قالاسىنىڭ اكىمى دارىن بۇلقايىر.

ەگەر تۇرعىندار كوشۋگە كونبەسە  سوت ارقىلى شىعارىلادى. سوندىقتان قۇجاتتاردى راسىمدەۋ تۇرعىنداردىڭ ءوز مۇددەسىنە ساي. جاڭا باسپانا بارلىق پاتەر يەلەرىنە ەمەس, تەك تۇراقتى تۇرىپ كەلگەن جانە بۇل جالعىز باسپاناسى بولعان ادامدارعا عانا بەرىلەدى.