الەم جاڭالىقتارىجاڭالىقتار
«قۇلدىق ەمەس, الاياقتىق»: ءسىم قازاقستاندىقتاردى ءوز ەركىمەن تۇزاققا ءتۇسىپ جاتىر دەپ سىنعا الدى
قر سىرتقى ىستەر مينيسترلىگىنىڭ وكىلى ايبەك سمادياروۆ قازاقستاندىقتاردىڭ وڭتۇستىك-شىعىس ازيادا «قۇلدىققا ءتۇسىپ جاتىر» دەگەن اقپاراتتارعا نۇكتە قويدى, دەپ جازادى qandastar.kz Skifnews.kz اقپارات پورتالىنا سىلتەمە جاساپ.
ونىڭ ايتۋىنشا, بۇل قۇلدىق ەمەس, الاياقتىقتىڭ قۇربانى بولۋ جاعدايلارى.
«وڭتۇستىك-شىعىس ازيا ەلدەرىنە قازاقستاندىقتار قۇلدىققا ءتۇسىپ جاتىر دەگەن اقپاراتتار تاراپ ءجۇر عوي. ونىڭ ءبارىن تەكسەردىك. ويتكەنى سوڭعى ەكى جىلدا كوبەيىپ كەتتى. بىراق بۇل ەشقانداي دا قۇلدىق ەمەس. بۇل تەك قانا الاياقتىق», – دەدى ول.
سمادياروۆتىڭ سوزىنشە, سول ايماقتاردا ينتەرنەت, كولل-ورتالىق سياقتى الاياقتاردىڭ زاڭسىز ۇيىمدارى جۇمىس ىستەيدى. ولار جۇمىسقا جوعارى جالاقى ۇسىنىپ, قازاقستاندىقتاردى تارتقاننان كەيىن, ءبىراز ۋاقىتتان سوڭ ادامدار نە ىستەرىن بىلمەي قالادى.
«ايلىقتارى جوعارى, ءبىر جىلداي جۇمىس ىستەپ, اقشالارىن جيناپ الادى دا سوسىن نە ىستەرىن بىلمەي, كونسۋلعا زۆوندايدى: “ويباي, ماعان كومەكتەسىڭىزدەر, مەنى شىعارىڭىزدار”, – دەيدى. ءبىز بارىپ كومەكتەسەمىز. ولار ەلگە كەلەدى, قۇجاتتارىن اۋىستىرادى, قايتادان بارادى اقشا جاساۋعا», – دەيدى رەسمي وكىل.
مينيسترلىك سوڭعى جىلدارى مۇنداي فاكتىلەردىڭ كوبەيگەنىن اتاپ ءوتىپ, جەرگىلىكتى بيلىك, قىتاي جانە بۇۇ-مەن بىرلەسىپ الاياقتىق سينديكاتتارعا قارسى كۇرەس جۇرگىزىپ جاتقانىن جەتكىزدى.
«سول ەلدەردىڭ بيلىكتەرىمەن, قىتايدىڭ بيلىگىمەن, بۇۇ-مەن بىرىگىپ, حالىقارالىق سينديكاتتارعا قارسى كۇرەسىپ جاتىرمىز. جاقىندا كامبودجا مەن لاوستا بىرنەشە قىتاي ازاماتى ۇستالىپ, ەلدەرىنە قايتارىلدى. ويتكەنى كوبىنە سولار الاياقتىق كومپانيالاردى باسقارادى», – دەپ مالىمدەدى ول.
ايبەك سمادياروۆ قازاقستاندىقتاردىڭ بۇل ۇيىمدارعا بىلە تۇرا باراتىنىن, ولاردىڭ جوعارى ءبىلىمى مەن ءتىلى بار ەكەنىن دە اتاپ ءوتتى.
«ونى بىلمەيدى, سانا-سەزىمى تومەن دەپ ايتۋعا بولمايدى. بىلمەسە ەكى ءتىل مەڭگەرگەن, جوعارى ءبىلىمى بار. سوندىقتان ەشقانداي دا قۇلدىق جوق», – دەپ تۇيىندەدى مينيسترلىك وكىلى.
