Qulybaevtyń taǵy bir kompanııasy sotta jeńilip qaldy

Foto: Olympic.kz

Mıllıarder Tımýr Qulybaev ıelik etetin «Kıpros» kompanııasy sotta Almatynyń iskerlik aýdanyndaǵy 1,79 gektar jerdi menshiginde qaldyra almady. Bul jer bir kezderi Ál-Farabı atyndaǵy QazUÝ-ǵa tıesili bolǵan. Onda bıznes-ortalyq salynýda, dep  qandastar.kz aqparat portaly Stan.kz-ke silteme jasap habarlaıdy.

16 qańtarda Almaty qalalyq soty birinshi satydaǵy sottyń 2024 jylǵy 11 qazandaǵy sheshimin ózgerissiz qaldyrý týraly qaýly shyǵardy. Osylaısha, «Kıpros» kompanııasy óziniń jer quqyǵyn dáleldeı almady. Endi 1,79 gektar jer ýchaskesi memleketke qaıtarylýy kerek.

Keńes zamanynan beri daýly aýmaq QazUÝ-ǵa tıesili boldy. 2007 jyly Almaty ákimdigi ınvestıııalyq kelisim negizinde ony qazir joq «Esentaı Development» jeke kompanııasyna berdi. Keıinnen jer birneshe fırmalarǵa satylyp, ony 2019 jyly «Kıpros» satyp aldy.

2024 jyldyń shildesinde Almaty qalasynyń Jer resýrstaryn basqarý departamenti jerdi satyp alý-satý týraly barlyq sharttardy jaramsyz dep tanýdy talap etip sotqa júgindi. Memlekettik organnyń pikirinshe, ýchaske «jer zańnamasynyń talaptaryn buza otyryp» berilgen. 2024 jyldyń qazan aıynda sot talapty qanaǵattandyrdy.

«Bastapqyda daýly jer ýchaskesin berý zańsyz júzege asyrylǵan. Atap aıtqanda laýazymdy tulǵalardyń zańsyz áreketterine baılanysty memlekettiń erkinen tys shyǵyp qalǵanyn eskere otyryp, sot alqasy jer ýchaskesin adal satyp alýshydan alyp qoıýdy negizdi dep sanaıdy», — delingen Almaty qalalyq sotynyń sheshiminde.

Jyljymaıtyn múliktiń biryńǵaı memlekettik kadastrynda onyń quny – 42,9 mıllıard teńge.

Eske salsaq, buǵan deıin Qazaqstan bıligi ótken jyly Qulybaevtyń baqylaýyndaǵy kompanııadan 54 nysandy tartyp alǵan.