جاڭالىقتار

قۇلجادان كەلگەن حات

سالەمەتسىزدەر مە, قازاقستان حالقى! مەنىڭ اتىم – گۇلجان (اتى وزگەرتىلدى). مەن قۇلجا قالاسىندا تۇرامىن. جاسىم 51 دە. مەنىڭ سىزدەرگە وسى جاقتا (شىڭجاڭدا) بولىپ جاتقان جاعدايلار تۋرالى حات جازعىم كەلىپ تۇر. بۇل حات سىزدەر جاققا بارا ما, جوق پا ونى ءبىر قۇداي بىلەدى. بىراق نەدە بولسا باعىمدى سىناپ كورمەكپىن. ۇستالسام «ساياسي ۇيرەنۋگە» مەن دە كەتەمىن. ۇستالماسام «ۇيرەنۋدە» وقىتۋشى بولىپ جۇرە بەرەمىن. نەدە بولسا, اماندىق تىلەيمىن بارىڭىزگە! 1 – مۇندا بارلىق ءجۇرىس-تۇرىس, تەلەفون, بايلانىس جاسايتىن ورتاڭ بارلىعى باقىلاۋعا الىنعان. اسىرەسە, قازاق باستىقتارى مەن ۇكىمەت كادرلارىنىڭ تەلەفوندارى قاتاڭ باقىلاۋدا. (حاتتى تۇسىندىرۋشىلەردىڭ سوزىنە قاراعاندا, الەۋمەتتىك جەلىلەر, ۇيالى تەلەفوندار كۇندەلىكتى تەكسەرۋدەن وتەدى. وندا قۇران جازۋلارى نەمەسە قازاقستان تۋرالى سوزدەر مەن سۋرەتتەر بولسا, قازاقى نىشاندار, ويۋ-ورنەكتەر بولسا, توتە جازۋمەن جازىلعان قازاقشا سوزدەر بولسا قاتاڭ تەكسەرىلىپ, «ساياسي ۇيرەنۋ» اتتى كونتسلاگەرگە جىبەرىلەدى ەكەن.) 2-قازىر «تۋىستاندىرۋ» ساياساتى (قىتايمەن تۋىستاسۋ. قىتايدىڭ ۇيىنە قازاق, قازاقتىڭ ۇيىنە قىتايدى قوندىرۋ, بىرگە ءىشىپ-جەۋ سىندى ساياسات) العاشقىداي ەمەس, ازايىپ, سايابىرلاپ قالدى. بۇرىن ءبىر ايدا 15 كۇن قارسى جاقتىڭ (قىتايدىڭ) ۇيىندە مەملەكەت قىزمەتكەرلەرى جاتۋعا مىندەتتى تۇعىن. قازىر ءبىر ايدا 2-3 كۇن عانا. ءتىپتى كەيبىرى بارمايتىن دا بولدى. تەك تەلەفون ارقىلى حابارلاسىپ, حال سۇراسىپ تۇرادى. ويتكەنى, مەيلى ءۇي تۇرعىندارى بولسىن, كادىرلەردىڭ وزدەرى بولسىن ءبارى وسىنداي ساياسي نۇسقاۋدان ابدەن مەزى بولعان. قازاقتار بولسا قىتايلارعا «ۇيگە قونباڭدار» دەيدى. كەيبىرى ەسىك الدىنان جولىعىپ, ۇيگە كىرگىزبەي قايتارعان. وسىعان بايلانىستى حالىق اراسىندا نارازىلىق ارىز-شاعىمدار كوبەيدى. بۇعان دەيىن ايەل قىزمەتكەرلەردى ەركەك بار ۇيگە, ەر قىزمەتكەرلەردى ايەل بار ۇيگە ادەيىلەپ جىبەرەتىن. ءتىپتى, اۋىلدان جىراق تاۋداعى مالشىلاردىڭ ۇيىنە دەيىن بارىپ, قونعان حانزۋلار بولدى. قازاق قىزمەتكەرلەر بولسا, قىنجىلعاننان تاماق تا ىشپەي, ۋاقىتتارى تولعاندا ۇيدەن شىعىپ كەتەتىن كەزدەرى دە بولعان. سول قىزمەتكەرلەردىڭ ءوزى قازىر شىڭجاڭنىڭ باس حاتشىسى – چىن چۋانگونى بوقتاپ وتىر. 3 – ءبىز شەكارا ايماققا جاقىن قالا بولساق تا, قازاق پەن ۇيعىردى شەكاراعا جاقىنداتپايدى. سەبەپ – شەكارا بۇزىپ, قازاقستانعا قاشىپ كەتۋىمىزدەن قورقادى. 4 – قازاقستانعا شىعا الاتىن جالعىز جول بار, ول – قازاقستاندا قارىزىم بار دەۋ. شەتەلدەگى قارىزدى قايتارىپ الىپ كەلۋگە ۆيزا اشىپ بەرەدى. ايتپەسە, قازاقستانعا شىعۋدىڭ باسقالاي مۇمكىندىگى قالمادى. كەلگەن حاتتىڭ نەگىزگى بولىگى وسى. سوڭعى جاعى جوعالىپ كەتۋىنە بايلانىستى ءارى قاراي اۆتوردىڭ نە ايتپاق بولعانى بەلگىسىز. بالكىم «ساياسي ۇيرەنۋدەگى» قازاقتاردىڭ اۋىر حالىن بايانداعان دا بولار. نەمەسە, ۇلتتى «قىتايلاندىرۋ ساياساتىن» جيىلەتىپ جاتقانىن بايان ەتكەن دە بولار. قازىرگە ءبىزدىڭ قولعا تيگەنى وسى. ۇلت تاعدىرى قاشان دا ءبىزدىڭ نازاردا!