قۇمار ويىندار تۋرالى پەتيتسيا بويىنشا شەشىم قابىلداندى

فوتو: iStock

تۋريزم جانە سپورت مينيسترلىگىنىڭ سايتىندا شەنەۋنىكتەردىڭ قۇمار ويىندارعا قاتىسۋىنا تىيىم سالۋعا قاتىستى پەتيتسيانى قاراۋ ناتيجەلەرى بويىنشا شەشىم جاريالاندى.

قۇجاتتا لۋدومانيامەن شىنىمەن كۇرەسۋ كەرەك جانە مەملەكەتتىك قىزمەتكەرلەرگە قۇمار ويىندارعا تىيىم سالۋ تۋرالى ۇسىنىس ورىندى ەكەندىگى ايتىلعان.

«وسىعان بايلانىستى مەملەكەتتىك قىزمەتشىلەرگە, اسكەري قىزمەتشىلەرگە, سونداي-اق قۇقىق قورعاۋ جانە ارنايى ورگانداردىڭ قىزمەتكەرلەرىنە تىيىم سالۋدى ەنگىزۋ ۇلتتىق زاڭناماعا وزگەرىستەر ەنگىزۋدى تالاپ ەتەدى. قازىرگى ۋاقىتتا مەملەكەتتىك ورگاندار مەن اسكەري قىزمەتكەرلەر ءۇشىن قۇمار ويىندار مەن ءباس تىگۋگە قاتىسۋعا شەكتەۋلەر ەنگىزۋ تۋرالى نورمالار پارلامەنت ءماجىلىسى دەپۋتاتتارىنىڭ باستاماسىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى, لوتەرەيا قىزمەتى, دەنساۋلىق ساقتاۋ, مەملەكەتتىك ەڭبەك ينسپەكتسياسى, مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا كوزدەلگەن «.

اتاپ ايتقاندا, زاڭ جوباسىندا مىناداي تارماقتار كوزدەلگەن:

1) «سىبايلاس جەمقورلىققا قارسى ءىس-قيمىل تۋرالى» زاڭنىڭ 12-بابى قۇمار ويىندارعا جانە ءباس تىگۋگە قاتىسۋعا تىيىم سالۋ تۇرىندەگى سىبايلاس جەمقورلىققا قارسى جاڭا شەكتەۋلەرمەن تولىقتىرىلادى;

2) «قۇقىق قورعاۋ قىزمەتى تۋرالى» زاڭنىڭ 80-بابى زاڭنامادا كوزدەلگەن سىبايلاس جەمقورلىققا قارسى شەكتەۋلەردى بۇزۋ تۇرىندە قىزمەتكەردى جۇمىستان بوساتۋ ءۇشىن جاڭا نەگىزبەن تولىقتىرىلادى;

3) «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى» زاڭنىڭ 51-بابى جانە «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭنىڭ 26-بابى ءباس تىگۋگە قاتىسقانى ءۇشىن تەرىس سەبەپتەر بويىنشا قىزمەتكەردى جۇمىستان شىعارۋ ءۇشىن نەگىزدەمەمەن تولىقتىرىلادى.

تىيىم ناقتى جەكە تۇلعالارعا ەمەس, ازاماتتاردىڭ ساناتىنا – مەملەكەتتىك قىزمەتشىلەرگە قاتىستى بەلگىلەنگەن. تيىسىنشە, شەنەۋنىك ارقاشان جۇمىستى جالعاستىرۋعا نەمەسە جۇمىستان شىعۋعا جانە قۇمار ويىنداردى كەدەرگىسىز ويناۋعا تاڭداۋ جاساي الادى.

بۇل شارالار مەملەكەتتىك ورگاندار مەن اسكەري قىزمەتشىلەردىڭ قۇمار ويىندارعا جانە ءباس تىگۋگە قاتىسۋدى شەكتەۋگە باعىتتالعان. وسىلايشا, پەتيتسيادا كوتەرىلگەن ۇسىنىستار زاڭ جوباسىندا قاراستىرىلعان. پەتيتسيا پارلامەنتتە زاڭ جوباسىن قاراۋعا كۇشتى سەرپىن بەردى جانە وندا كوزدەلگەن نورمالارعا قوعامنىڭ سۇرانىسىن راستادى.