Kúni-túni jumys istedi: Ýspen aýdanynyń turǵyndary sý tasqynyna qarsy sharalar jaıly aıtyp berdi

Oblystyq tótenshe jaǵdaılar basqarmasy men jergilikti atqarýshy organdardan jalpy 30-dan astam tehnıka jiberilip, 100-den astam adam jumyldyryldy

Ýspen aýdany ákiminiń orynbasary Talǵat Beshenbaevtyń aıtýynsha,  aýdanda sý tasqynyna qarsy jumystar júrgizilýde.

– Erigen qar sýynyń saldarynan zardap shekken 41 otbasy bolǵan. Olardyń ishinde keıbir úılerge sý kóbirek kirse, keıbir otbasylardyń qorasyna ǵana, úılerdiń qasynda ornalasqan ǵımarattarǵa kirgen. Oblys ákiminiń qoldaýymen barlyq zardap shekken otbasylarǵa bıýdjettik emes uıymmen, sondaı-aq jergilikti atqarýshy organdary bıýdjetinen qarjylaı kómek kórsetildi. Eshbir otbasy syrtta qalǵan joq, jaǵdaı tolyǵymen baqylaýda, – deıdi Talǵat Beshenbaev.

Sý tasqynynan zardap shekken turǵyndardyń biri Nadejda Fomenkonyń bul jerde turyp jatqanyna 40 jyl bolǵan.

– Mundaı jaǵdaı bolady dep kútpegen edik. Sebebi, qar az jaýǵan edi.  Tas jolynan sý kele bastaǵanda qatty shoshyp kettik.  Táýlik boıy esikti ashpaı otyrdyq, sý tabaldyryqtan joǵary kóterildi. Jertóle men as úıdiń ishi sýǵa toldy, – deıdi ol.

Zeınetkerdiń aıtýynsha, arnaıy komıssııa qurylyp, turǵyndar men eriktiler kúni-túni jumys istegen.

– Memleket tarapynan kómek kórsetilip jatqanyna rızashylyǵymyzdy bildiremiz. Aqsha jetkenshe isteımiz, qalǵanyn óz kúshimizben qalypqa keltiremiz.  Bizdiń edenniń astynda ǵana sý kóterildi. Qalǵandarynyń jaǵdaıy odan da qıyn boldy, –  deıdi Nadejda Fomenko.

Azıma Arynova «Dıplommen – aýylǵa» baǵdarlamasy boıynsha jumys isteýge kelip, baspana satyp alǵan.  Ol bólingen qarajattyń jóndeý jumystaryna jete me  ekenin mamandar esepteıtinin aıtady.

– Úıimizdiń nesıesi áli tolyq ótelmegen. О́tinish jazǵannan keıin oblystyq bıýdjetten kelesi kúni lezde qarajat tústi.  Jóndeý jumystaryn óz kúshimizben júrgizemiz. Mundaı apat bolady dep kim oılaǵan? Degenmen, barynsha jedel jumystar atqarylyp jatqanyna rızamyz, – deıdi aýyl turǵyny. 

QR Prezıdenti Qasym-Jomart Toqaevtyń tapsyrmasyna sáıkes Pavlodar oblysynda sý tasqynynan zardap shekken otbasylardyń materıaldyq shyǵyndary tolyqtaı óteldi. Oblys boıynsha qurylǵan arnaıy komıssııa sheshimimen barlyǵy 125 otbasyǵa túrli deńgeıde shyǵyn esepteldi. Búgingi tańda 120 otbasyǵa 97 mln teńge kóleminde ótemaqy berildi. Qalpyna keltirýge jaramaıtyn Aqtoǵaı aýdany Jalaýly aýylyndaǵy bes úı jańadan salynady.

Arnaıy komıssııa sáýir aıynyń sońyna deıin óz jumysyn jalǵastyrady.