كۇنىنە 40 مىڭ تگ تاپقان: مۇگەدەك ەر مەن ايەلدى 8 جىل بويى قايىر سۇراۋعا ماجبۇرلەگەندەر تۋرالى سۇمدىق اقپارات شىقتى

قاراعاندىدا مۇگەدەك ەر مەن ايەلدى 8 جىل بويى قايىر سۇراۋعا ماجبۇرلەگەن, دەپ حابارلايدى Qandastar.kz اقپاراتتىق پورتالى Azattyq Rýhy. سايتىنا سىلتەپ.

1984 جىلى تۋعان ب. ەسىمدى ادام 2015 جىلى قاراعاندى ق. «تسۋم» ساۋدا ءۇيىنىڭ ماڭايىندا قايىر سۇراپ تۇرعان ل. مەن م.-نى كورىپ, ولارمەن تانىسقان. قاسكوي ل.-نىڭ قول-اياعى جوعىن پايدالانىپ, م. ەكەۋىن قورقىتىپ, وزىنە جۇمىس ىستەتۋدى باستايدى.

ولاردىڭ تابىسىن تارتىپ الىپ, ءوز قاجەتتىلىگىنە جۇمسايدى. 2020 جىلى ب. ەر مەن ايەلدى اقتاس كەنتىندە پاتەرگە ورنالاستىرادى. كوپ ۋاقىت وتپەي ولاردىڭ بالاسى دۇنيەگە كەلەدى. سول كەزدە ب. ءسابيدى تارتىپ الىپ, اپكەسىنە اسىراۋعا بەرىپ, اتا-انا قۇقىعىنان ايىرامىن دەپ قوقان-لوقى كورسەتۋ ارقىلى جابىرلەنۋشىلەردى باقىلاۋدا ۇستاعان. 2023 جىلى پوليتسيا قىزمەتكەرلەرىمەن ب.-نى باسقا قىلمىس بويىنشا كۇدىكتى رەتىندە ۇستايدى. ب. تەرگەۋ يزولياتورىندا وتىرعانىنا قاراماستان, قىلمىستىق ارەكەتىن جالعاستىرىپ, تۋىستارى مەن تانىستارىن: ۆ., گ. جانە ح.-نى تارتىپ, ۇيىمداسقان قىلمىستىق توپ قۇرعان.

بۇل توپ جابىرلەنۋشىلەردى قايتادان قايىر سۇراتۋعا ماجبۇرلەگەن. جينالعان اقشا ۆ-نىڭ اۆتوكولىگىنىڭ اي سايىنعى نەسيەسىن تولەۋگە, ۇيىمداسقان قىلمىستىق توپتىڭ جانە ب-نىڭ ءارتۇرلى قاجەتتىلىكتەرىنە جۇمسالعان.

«ولار 2015 جىلدىڭ قاڭتارىنان باستاپ 09.12.2023 ج. ارالىعىندا ب-عا كۇنىنە 20000-نان 40 000 تەڭگەگە دەيىن بەرىپ وتىرعان», — دەپ حابارلايدى سوت.

قىلمىستىق توپتىڭ مۇشەلەرى قالاي جازالاندى

سوت وتىرىسىندا جابىرلەنۋشىلەردىڭ, كۋالاردىڭ ايعاقتارى مەن ساراپتاما قورىتىندىلارى ارقىلى سوتتالۋشىلاردىڭ كىناسى تولىق دالەلدەندى. پروكۋرور ب.-عا 20 جىل, وزگەلەرىنە 17 جىلدان بەرۋ تۋرالى جازالاۋ شاراسىن سۇراعان.

سوت شەشىمىمەن:

• ب. – 17 جىلعا,
• ۆ., گ. جانە ح. – ارقايسىسى 12 جىلعا باس بوستاندىعىنان ايىرىلدى.

جازا تاعايىنداۋ كەزىندە ب.-نىڭ قىلمىستى قايتالاپ جاساۋى اۋىرلاتاتىن ءمان-جاي دەپ تانىلدى. ال وزگەلەرگە قاتىستى جاس بالالارىنىڭ بولۋى – جەڭىلدەتەتىن فاكتور رەتىندە ەسكەرىلدى.

سونىمەن قاتار سوت جابىرلەنۋشىلەرگە مورالدىق وتەماقى ءوندىرۋ تۋرالى تالاپتاردى ءىشىنارا قاناعاتتاندىردى. اتاپ ايتقاندا, ب. – 3 ملن تەڭگە, گ. مەن ح. – ارقايسىسى 2 ملن تەڭگە, ال ۆ. – 1 ملن تەڭگە تولەۋگە مىندەتتەلدى.

ۇكىم زاڭدى كۇشىنە ەنگەن جوق.