جاڭالىقتار
«قۇنى 2,4 ملن تەڭگە»: «قازاقستان حالقىنا» قورىنىڭ باسشىسى قىمبات كوستيۋممەن كوزگە ءتۇستى
«قازاقستان حالقىنا» قورىنىڭ باسقارما ءتورايىمى ءلاززات شىڭعىسباەۆا قىزىلورداداعى ءىس-شاراعا بارعان كەزدە كيگەن قىمبات كيىمى قوعامدا ۇلكەن پىكىرتالاس تۋدىردى. الەۋمەتتىك جەلى قولدانۋشىلارى ونىڭ Miu Miu ماركالى پيدجاگى شامامەن 2,4 ميلليون تەڭگە, ال Fendi برەندىنىڭ شالبارى 1 ميلليون تەڭگە تۇراتىنىن انىقتاپ, نارازى بولدى, دەپ حابارلايدى qandastar.kz
بۇل جاعداي اسىرەسە سيرەك اۋرۋعا شالدىققان بالالاردىڭ اتا-انالارى اراسىندا قىزۋ تالقىلاندى. ولاردىڭ ايتۋىنشا, قور 2022 جىلدان بەرى تىركەلمەگەن قىمبات دارىلەردى ساتىپ الۋعا كومەكتەسىپ كەلگەن. الايدا بيىل مامىر ايىندا قارجى تاپشىلىعىنا بايلانىستى بۇل قولداۋ توقتاتىلىپ, قاراجات باسقا جوبالارعا باعىتتالعانى حابارلانعان.
Skifnews.kz جازعانداي, ديۋشەنن بۇلشىقەت ديستروفياسىمەن اۋىراتىن بالالاردىڭ اتا-انالارى بىرنەشە رەت قور باسشىلىعىمەن كەزدەسۋگە تىرىسقان. ارنايى استاناعا بارعان كۇندەرى ولاردى ەشكىم قابىلداماعان. كەيىن شىڭعىسباەۆانىڭ قىزىلورداداعى شارادا قىمبات برەند كيىممەن جۇرگەن سۋرەتىن كورىپ, اشۋ-ىزاعا بۋلىققان.
«سىرتقى كورىنىسىنىڭ ءوزى وسىنداي بولسا, جالاقىسى قانداي ەكەن دەگەن سۇراق تۋادى. بالالاردىڭ ەمىنە اقشا جەتپەي جاتقاندا, قىمبات كيىم كيۋ قانشالىقتى ورىندى?» – دەيدى «ومىرگە سەن» قورىنىڭ جەتەكشىسى سابيليا شۇگەلوۆا.
الايدا «قازاقستان حالقىنا» قورىنىڭ وكىلى بۇل سىنعا جاۋاپ بەرىپ, شىڭعىسباەۆانىڭ كيىمى تۇپنۇسقا ەمەس, تۇركيادا تىگىلگەن كوشىرمە ەكەنىن ايتتى.
