قۇنى ميلليونداعان جالعان ءونىم: تاڭبالانباعان ونىمدەر تاركىلەندى

فوتو: اشىق دەرەككوز

قۇنى ميلليونداعان جالعان ءونىم: تاڭبالانباعان ونىمدەر تاركىلەندى, دەپ جازدى qandastar.kz

الماتى قالاسى بويىنشا مەملەكەتتىك كىرىستەر دەپارتامەنتى (مكد) تۇركسىب جانە المالى اۋداندارى بويىنشا مەملەكەتتىك كىرىستەر باسقارمالارىمەن بىرلەسىپ, اكتسيزدەلەتىن ونىمدەردىڭ زاڭسىز اينالىمىن انىقتاۋ ماقساتىندا قالا بازارلارىندا اۋقىمدى تەكسەرۋلەر جۇرگىزدى. ناتيجەسىندە جالپى قۇنى 13 783 760 تەڭگەنى قۇرايتىن تسيفرلىق كودپەن تاڭبالانباعان تەمەكى ونىمدەرى تاركىلەندى.

ەسكە سالايىق, قازاقستاندا تەمەكى ونىمدەرىن مىندەتتى تسيفرلىق تاڭبالاۋ 2020 جىلدىڭ 1 قازانىنان باستاپ ەنگىزىلگەن بولاتىن. بۇل شارانىڭ ماقساتى – ءونىمنىڭ زاڭسىز اينالىمىمەن كۇرەسۋ, تۇتىنۋشىلاردىڭ قۇقىقتارىن قورعاۋ جانە نارىقتىڭ اشىقتىعىن قامتاماسىز ەتۋ. تاڭبالانباعان ونىمدەردى پايدالانۋ اكىمشىلىك شارالارعا اكەپ سوعاتىن زاڭ بۇزۋشىلىق بولىپ تابىلادى.

تاڭبالاۋ مەملەكەتكە نارىقتى باقىلاۋعا, سالىق تۇسىمدەرىن ارتتىرۋعا جانە كولەڭكەلى ەكونوميكامەن كۇرەسۋگە مۇمكىندىك بەرەدى; بيزنەس ءۇشىن ول – كونترافاكتىلىك ونىمدەردەن قورعاۋ, برەندكە دەگەن سەنىمدى ارتتىرۋ جانە لوگيستيكانى وڭتايلاندىرۋدىڭ قۇرالى; تۇتىنۋشىلار ءۇشىن ول – تاۋارلاردىڭ ساپاسىنا كەپىلدىك بەرۋ, تاۋار تۋرالى سەنىمدى اقپارات جانە قازاقستان حالقىنىڭ دەنساۋلىعىن ساقتاۋدىڭ كەپىلى.

بۇگىنگى تاڭدا تاۋارلاردى تاڭبالاۋ جانە قاداعالاۋ اقپاراتتىق جۇيەسىندە تەمەكى ونىمدەرىنىڭ اينالىمىنا 45 893 قاتىسۋشى تىركەلگەن, ونىڭ ىشىندە: 208 يمپورتتاۋشى, 4 ءوندىرۋشى, 759 كوتەرمە جانە 43 782 بولشەك ساۋدا وكىلى.

تەكسەرۋلەردىڭ ناتيجەلەرى

«الماتى-1», «تۇركسىب», «جەتىسۋ-سەميرەچە», «بارىس» جانە «جۇلدىز» بازارلارىندا جۇرگىزىلگەن تەكسەرۋلەر بارىسىندا زاڭسىز اينالىمنان كەلەسى ونىمدەر تاركىلەندى:

• 20 780 قوراپ كونترافاكتىلىك تەمەكى;
• 73 قوراپ كالياندى تاڭبالانباعان تەمەكى.

زاڭسىز تەمەكىنىڭ ساپاسى باقىلانباعاندىقتان, ونىڭ قۇرامىندا اۋىر مەتالدار, پەستيتسيدتەر جانە باسقا دا زياندى لاستاۋشى زاتتاردى قوسا العاندا, اۋىر سىرقاتتانۋ قاۋپىن ارتتىراتىن ۋلى زاتتاردىڭ جوعارى دەڭگەيى بار ەكەنى بەلگىلى.

بۇل ارەكەتتەر قازاقستان رەسپۋبليكاسىنىڭ «اكىمشىلىك قۇقىق بۇزۋشىلىق تۋرالى» كودەكسىنىڭ 283-بابىنىڭ 2-بولىگىندە كوزدەلگەن قۇقىق بۇزۋشىلىق بولىپ تابىلادى. مۇنداي قۇقىق بۇزۋشىلىقتار ءۇشىن 150-دەن 500-گە دەيىنگى ايلىق ەسەپتىك كورسەتكىش (اەك) مولشەرىندە ايىپپۇل تۇرىندە اكىمشىلىك جاۋاپكەرشىلىك قاراستىرىلعان. ايىپپۇل مولشەرى سوت شەشىمىمەن انىقتالادى.

مەملەكەتتىك كىرىستەر كوميتەتىنىڭ مالىمەتىنشە, قازاقستانعا اكەلىنەتىن تاڭبالانباعان تەمەكى ونىمدەرىنىڭ نەگىزگى كوزدەرى قىرعىزستان مەن قىتاي بولىپ تابىلادى. شەكاراداعى باقىلاۋدى كۇشەيتۋ جانە تاڭبالاۋدى ەنگىزۋ كونترافاكتىلىك تاۋارلاردىڭ كولەمىن ايتارلىقتاي ازايتۋعا مۇمكىندىك بەرەدى.

ءىس ماتەريالدارى سوت ورگاندارىنا ءارى قاراي قاراۋ ءۇشىن جىبەرىلدى.