«قۇپيا بولعانىن قالايمىن»: حالىق ءارتىسى نۇرجامال ۇسەنباەۆا سىرىن اقتاردى

Jibek Joly ارناسىنداعى «بۇگىن.Live» باعدارلاماسىنا قازاقستان مەن تاتارستاننىڭ حالىق ءارتىسى, ءانشى نۇرجامال ۇسەنباەۆا سۇحبات بەردى. ءانشى وتباسى تۋرالى سىر اقتارىپ, توعىز نەمەرە تاربيەلەپ وتىرعان اجە ەكەنىن جاسىرمادى, دەپ جازادى Qandastar.kz اقپارات پورتالى. 

ء«ومىرىمنىڭ قۇپيا بولعانىن قالايمىن. بىزدە 9 نەمەرە بار. مەن جامان ەمەس اجەمىن دەپ ويلايمىن. ويتكەنى بارلىق بالاعا ەركىندىك بەردىك. ارقايسىسى وزىمەن-ءوزى. وتباسىلارى بار. سوندىقتان ولارعا دا جاقسى, بىزگە دە جاقسى. ويتكەنى سىزدەر بىلەسىزدەر, تولەگەن مۇحامەدجانوۆ – مەنىڭ جان سەرىگىم, جولداسىم. ءبىز – ونەر ادامىمىز. بىزگە دە شىعارماشىلىق اتموسفەرا كەرەك. ساعات تۇنگى ون ەكىدە مەن رويالعا وتىرىپ, اندەرىمدى جاتتاپ, راسپەۆكا جاساپ, اندەرىمدى شىرقاپ, شابىتىم اشىلۋى مۇمكىن. ال ماەسترودا شابىت اشىلسا, ول دا جۇمىس ىستەيدى. ءبىز ەشكىمگە بوگەت جاسامايمىز», — دەدى ول.

نۇرجامال ۇسەنباەۆانىڭ سوزىنشە, نەمەرەلەرىنىڭ ەشقايسىسى ونەر جولىنا تۇسپەگەن, دەگەنمەن ولاردىڭ ءبارى ونەردى سۇيەتىن كورىنەدى.

«ولار ونەردە ەمەس, بىراق ونەردى جاقسى كورەدى. ارينە, ءبىزدىڭ كونتسەرتتەرىمىزگە گۇل شوعىن قۇشاقتاپ بارادى. نەمەرەلەر سۋرەت سالادى, بيمەن اينالىسادى. ءبىز ءالى جاسپىز, شوبەرە سۇيەتىن ۋاقىت كەلمەدى», — دەيدى ول.

وپەرا ءانشىسى الەۋمەتتىك جەلىدەگى حەيتەرلەر تۋرالى دا ايتا كەتتى.

«ەندى كەيبىر ادامدار جاقسى سوزدەر جازادى, تىلەكتەر. وزىمە ۇنامايتىن سوزدەر جازاتىندار دا بولادى. اركىمگە ۇناعانىم دۇرىس ەمەس, شارت ەمەس», — دەدى ونەر يەسى.