قۇپيا دەرەكتەردىڭ تاراۋى: ەڭبەكميندەگى ىقپالدى شەنەۋنىك ۇستالدى

فوتو: دالانيۋس

ەڭبەك جانە حالىقتى الەۋمەتتىك قورعاۋ ۆيتسە-ءمينيسترى بولعان اقمادي سارباسوۆ ۇستالدى, دەپ حابارلايدى  qandastar.kz     Dalanews.kz-كە سىلتەمە جاساپ.

قازىرگى ۋاقىتتا اقمادي سارباسوۆ –ەڭبەك رەسۋرستارىن دامىتۋ ورتالىعىنىڭ پرەزيدەنتى قىزمەتىن اتقارادى. بۇل ۇيىم ەڭبەك جانە حالىقتى الەۋمەتتىك قورعاۋ مينيسترلىگىنە باعىنىستى.

«زا نامي ۆىەحالي» تەلەگرام ارناسىنىڭ مالىمەتىنشە, كەشە الماتى قالاسىنىڭ تەرگەۋ سوتىنىڭ كەستەسىندە ونىڭ اتى-ءجونى پايدا بولدى. وسىدان كەيىن تەرگەۋ ورگانىنا جانە مينيسترلىككە رەسمي سۇراۋ جولدانعان, الايدا ناقتى جاۋاپ تەك بۇگىن بەلگىلى بولعان.

مينيسترلىكتىڭ مالىمدەمەسى:

«ەڭبەك جانە حالىقتى الەۋمەتتىك قورعاۋ مينيسترلىگى «ەڭبەك رەسۋرستارىن دامىتۋ ورتالىعى» اق باسشىسىنىڭ ۇستالعانىن راستايدى. مينيسترلىك تەرگەۋ ورگاندارىنا بەلگىلەنگەن تارتىپكە سايكەس كومەك كورسەتىپ جاتىر».

اقمادي سارباسوۆ مينيسترلىك قۇرىلىمىندا 2005 جىلدان بەرى جۇمىس ىستەدى, 15 جىل ىشىندە ۆيتسە-مينيستر دارەجەسىنە دەيىن كوتەرىلدى. 2025 جىلى ول ەڭبەك رەسۋرستارىن دامىتۋ ورتالىعىنا باسشىلىققا اۋىستى. بۇعان دەيىن ەشقانداي داۋ-شارعا ىلىكپەگەن, كەيبىرەۋلەردىڭ ايتۋىنشا, ول – «بەيتاراپ ساياساتكەر».

اقمادي سارباسوۆپەن قاتار ورتالىقتىڭ بۇرىنعى باسشىسى داۋلەت ارعاندىكوۆ پەن «ءبىرىنشى كرەديتتىك بيۋرو» كومپانياسىنىڭ باس ديرەكتورى رۋسلان وماروۆقا دا بۇلتارتپاۋ شاراسى قولدانىلعان.

داۋلەت ارعاندىكوۆ ورتالىققا دەيىن 2014–2015 جىلدارى دەنساۋلىق ساقتاۋ جانە الەۋمەتتىك قورعاۋ ۆيتسە-ءمينيسترى بولعان. 2015–2018 جىلدارى ەڭبەك رەسۋرستارىن دامىتۋ ورتالىعىنىڭ پرەزيدەنتى قىزمەتىن اتقارىپ, كەيىن كونسالتينگ سالاسىنا كەتكەن. 2020 جىلى ورتالىققا قايتا ورالعان, الايدا ەكى اي بۇرىن پرەزيدەنتتىك قىزمەتىنەن كەتكەن.

جۋرناليست ميحايل كوزاچكوۆتىڭ جازۋىنشا, تەرگەۋ بولجامىنا سايكەس, ورتالىقتا ازاماتتار مەن ولاردىڭ نەسيەلەرى تۋرالى اقپاراتتى «ءبىرىنشى كرەديتتىك بيۋروعا» اقىلى تۇردە بەرگەن. كومپانيا قىزمەتكەرلەرى VPN ارقىلى مەملەكەتتىك ۇيىم بازالارىنا قوسىلىپ, قاجەتتى دەرەكتەردى العان. كەيىن, كوزاچكوۆتىڭ مالىمەتى بويىنشا, بيۋرو قازاقستاندىقتارعا قاتىستى كرەديتتىك دوسە ازىرلەپ, ونى ەكىنشى دەڭگەيلى بانكتەرگە جىبەرگەن. ال بۇل جۇمىس ءۇشىن بانكتەر بيۋروعا اقشا تولەگەن.

بيۋرو باسشىسى رۋسلان وماروۆ 80 مىڭ دوللار بەرىپ جاتقان كەزدە ۇستالعان. ول ورتالىق باسشىلىعىنا جۇيەلى تۇردە پارا بەردى دەگەن كۇدىككە ىلىنگەن.

رۋسلان وماروۆ كرەديتتىك بيۋرودان بولەك, ءتۇرلى بانكتەر قۇرىلىمىندا جۇمىس ىستەگەن. بىرنەشە اي بۇرىن ول ۇلتتىق ەكونوميكا مينيسترلىگى جانىنداعى قوعامدىق كەڭەسكە مۇشە رەتىندە كىرگەن.