قۇرباندىققا شالىنعان مالدىڭ تەرىسىن ساتۋعا بولا ما?

فوتو: اشىق دەرەككوزدەن

كوپشىلىك «قۇرباندىققا شالىنعان مالدىڭ تەرىسىن ساتۋعا بولا ما?» دەپ سۇراپ جاتادى.

جاۋاپ: قۇرباندىققا شالىنعان مالدىڭ ەتىن, تەرىسىن, ىشكى اعزالارىن جانە ءمۇيىزىن ساتۋ دۇرىس ەمەس. كىمدە-كىم قۇربان مالىنىڭ اتالمىش بولشەكتەرىن ساتسا, قۇنى كەدەيلەرگە ساداقا رەتىندە بەرىلەدى

پايعامبارىمىز (وعان اللانىڭ سالاۋاتى مەن سالەمى بولسىن):

مَنْ بَاعَ جِلْدَ أُضْحِيَّتِهِ فَلَا أُضْحِيَّةَ لَهُ

«كىم قۇرباندىعىنىڭ تەرىسىن ساتسا, ونىڭ قۇرباندىعى ەسەپتەلمەيدى» دەگەن. قۇرباندىققا شالىنعان مالدىڭ تەرىسىن ساتۋ دۇرىس بولماسا, وندا ەتىن دە ساتۋعا بولمايدى دەگەن ءسوز.

«ءتابينۋ ءال-حاقايىق» اتتى كىتاپتا: «ول ەكەۋىن (تەرىسى مەن ەتىن) ساداقا ەتۋ ماقساتىندا ساتاتىن بولسا رۇقسات. ويتكەنى ول دا تەرىسى مەن ەتىن ساداقا ەتكەنمەن تەڭ. ال اللا ەلشىسىنىڭ (وعان اللانىڭ سالاۋاتى مەن سالەمى بولسىن): «كىم قۇرباندىعىنىڭ تەرىسىن ساتسا, ونىق قۇرباندىعى ەسەپتەلمەيدى» دەگەن ءحاديسى ساتۋدىڭ ماكرۋھ ەكەندىگىن بىلدىرەدى», – دەلىنگەن.

«ءال-حۋلاسا» اتتى كىتاپتا بىلاي كەلگەن: «قۇرباندىق ەتىن ساتىپ, اقشاسىن ساداقا ەتۋدى قالاعان ادام, ولاي ىستەمەگەن دۇرىس. ويتكەنى ول قۇرباندىقتى تەك ءوزى جەۋى نەمەسە باسقالارعا بەرۋى كەرەك».

وسىعان وراي, قۇربان شالۋشى مالدىڭ ەتىن دە, تەرىسىن دە ساتۋىنا بولمايدى. ساتقان جاعدايدا اقشاسىن ساداقا ەتىپ جىبەرەدى. الايدا قۇرباندىق شالۋشى مالدىڭ تەرىسىن ءوزى پايدالانباسا نەمەسە باسقا بىرەۋگە ساداقا ەتىپ بەرۋگە دە مۇمكىندىگى بولماسا, وندا ونى ساتىپ اقشاسىن ساداقا ەتەدى. ساتۋعا دا ىڭعايى كەلمەسە, جەرگە كومىپ تاستايدى. ويتكەنى شاريعاتىمىزدا پەندەگە شاماسى كەلگەندى عانا جۇكتەيدى. ال قۇرباندىق ەتىن, اقشاسىن ساداقا ەتۋ ماقساتىمەن بولسا دا, ساتپاعانى ءجون.

«قۇرباندىق ءپاتۋالارى» كىتابىنان