قۇرداستارىن ۇرىپ, كامەراعا تۇسىرگەن جاسوسپىرىمدەر جازالانباق

فوتو: ۆيدەودان سكرينشوت

جاسوسپىرىمدەر اراسىنداعى بۇزاقىلىقتىڭ تاعى ءبىر وقيعاسى – بالانى كوپشىلىكتىڭ كوزىنشە ۇرىپ-سوقانىمەن قويماي, كامەراعا جازىپ العان, دەپ حابارلادى Qandastar.kz.

21 شىلدە كۇنى الماتى وبلىسىنىڭ تالعار اۋدانىندا ءۇش ءجاسوسپىرىم ادام جوق جەردە بالانى قىزداردىڭ كوزىنشە ۇرىپ-سوعىپ, ءبارىن كامەراعا ءتۇسىرىپ العان. ول ۆيدەونى كەيىن كەلەمەجدەۋ ءۇشىن پايدالانۋ ماقساتىندا ساقتايمىز دەپ ويلاعان.

وقيعانى باستان-اياق ادۆوكات الەنا نەفف ءوزىنىڭ Instagram پاراقشاسىندا جاريالادى. بۇل جاعداي جازدا بولعان.

ادۆوكاتتىڭ ايتۋىنشا, بۇل جاسوسپىرىمدەر بۇعان دەيىن دە وسىنداي ارەكەتتەر جاساپ, جاۋاپكەرشىلىكتەن قۇتىلىپ كەتكەن.

جابىرلەنۋشى بالا بۇرىن وسى توپپەن دوس بولعان, بىراق دوستارىنىڭ كىشى بالالارعا جاسايتىن ارەكەتتەرى ۇناماعاننان كەيىن قارىم-قاتىناستى ۇزگەن.

– بىرنەشە اپتا بويى ەسكى دوستارى بۇنى ءتۇرلى سىلتاۋلارمەن كەزدەسۋگە شاقىرعان. الايدا بالا دوستارىمەن كەزدەسۋگە اسا قۇنتتاماعان, – دەپ جازدى قورعاۋشى.

اقىرىندا جەتكىنشەكتەر بالانى قاڭىراپ بوس جاتقان دالادا سوققىعا جىققان.

«بالانىڭ بەتىندە ىسىكپەن بىرگە گەماتوما تۇرىندەگى جاراقاتتار جانە تاياقپەن ۇرعاننان قولىندا جاراقاتتار پايدا بولدى. ۇشەۋى دە وسى بەينەجازبانى ءتۇسىردى. ءبىز ولاردىڭ ۇشەۋى دە جاۋاپقا تارتىلادى دەپ ۇمىتتەنەمىز», – دەپ اتاپ ءوتتى قۇقىق قورعاۋشى.

جابىرلەنۋشى بالانى اتا-اناسى وسى ۆيدەودان كەيىن پوليتسياعا جۇگىنگەن.

رەداكتسيانىڭ ساۋالىنا الماتى وبلىسى پوليتسيا دەپارتامەنتىندە قاساقانا جەڭىل دەنە جاراقاتىن سالۋ فاكتىسى بويىنشا قىلمىستىق ءىس قوزعالعانىن حابارلادى.

«قازىر تولىق ءارى جان-جاقتى جانە وبەكتيۆتى زەرتتەۋ ءۇشىن بارلىق قاجەتتى تەرگەۋ ءىس-شارالارى جۇرگىزىلۋدە. تەرگەۋ جالعاسىپ جاتىر», دەپ حابارلادى پوليتسيا باسقارماسى.