جاڭالىقتار
كۇتپەگەن سوققى بولدى: ومىرزاق شوكەەۆتىڭ رەسمي قىزمەتكە ورالۋ شانسىنا نۇكتە قويىلدى
فوتو: اشىق دەرەككوز
كەزىندە تۇركىستان, قوستاناي, وڭتۇستىك-قازاقستان وبلىستارى مەن استانا قالاسىنىڭ اكىمى, پرەمەر-ءمينيستردىڭ ورىنباسارى بولعان ومىرزاق شوكەەۆ ەندى مەملەكەتتىك جانە كۆازيمەملەكەتتىك قۇرىلىمدارعا ورالمايدى. ەگەر جەكە بيزنەسپەن اينالىسسا جانە ول زاڭدى بولسا, وعان ەشكىم تيىسپەيدى. ال قوعامدىق جۇمىسپەن اينالىسسا, ساياسات تاقىرىبىنان بارىنشا الىس جۇرگەنى ابزال. بيىل 60 جاسقا تولعان, زەينەت جاسىنا ءالى ءۇش جىل ۋاقىتى بار, كۇش-قۋاتى تاسىپ تۇرعان ومىرزاق شوكەەۆكە قاتىستى «سول جاعالاۋ» ۇستانىمى وسىنداي بولىپ وتىر دەيدى, qandastar.kz DALA INSIDE دەرەككوزىنە سىلتەمە جاساپ.
ومىرزاق شوكەەۆ بەردىبەك ساپارباەۆ, يمانعالي تاسماعامبەتوۆتەرمەن ءبىر قاتاردا تۇرىپ, «ەسكى قازاقستانداعى» ەڭ تانىمال شەنەۋنىكتىڭ ءبىرى بولعان ەدى. رەسمي مانسابىن ول 2022 جىلى تۇركىستان وبلىسىنىڭ اكىمى رەتىندە اياقتادى. قول استىنا قارايتىن كەنتاۋ اكىمى داۋرەن ماقاجانوۆ پارا الىپ سوتتالعاندا, زاڭ بويىنشا شوكەەۆ وتستاۆكاعا بەرۋى ءتيىس بولاتىن.
«وتستاۆكا بويىنشا بەرىلگەن ءوتىنىشتى مەملەكەت باسشىسى قاناعاتتاندىردى دەگەن حابار جەتكەندە بۇل ومىرزاق ەستاي ۇلى ءۇشىن شىنىمەن دە كۇتپەگەن سوققى بولدى. ول بەس كۇن بويى ءوز-وزىنە كەلە الماي ءجۇردى», – دەپ سىر شەرتەدى, دەرەككوز.
بيىل «جاڭا قازاقستان» ومىرزاق شوكەەۆكە تۇركىستان وبلىسىنىڭ قۇرمەتتى ازاماتى اتاعىن بەردى. ياعني ارقادان سيپاپ, جىلى شىعارىپ سالۋدىڭ قالىپتاسقان يشاراسىن جاسادى. ەندى ەستاي ۇلى ءوز جۇمىستارىمەن تىنىش قانا اينالىسىپ, ءومىرىنىڭ قالعان جىلدارىن ماعىنالى دا ءماندى وتكىزىپ, ۋاقىتىن ۇرپاقتارىنا باعىتتايتىن سياقتى.
«ەگيدا ش» وپەراتسياسى قايتالانبايتىن بولدى
2022 جىلى قىزىق وقيعا ورىن العان. وڭتۇستىك وڭىردە بەلسەندىلىگىمەن كوزگە ءتۇسىپ جۇرگەن ساياسي تەحنولوگ سەرىك باينازاروۆ تۇركىستان وبلىسىندا اكىم بولىپ وتىرعان ومىرزاق شوكەەۆگە «ەگيدا ش» دەپ اتالاتىن ساياسي پيار جوسپارىن ۇسىنادى. «وسى جوسپاردىڭ ارقاسىندا اكىم كرەسلوسىن ساقتاپ قالاسىز» دەپ ۇگىتتەپ, 1 ميلليون دوللار سۇراعان. مۇنىڭ الاياقتىق ەكەنىن بىردەن سەزگەن ومىرزاق ەستاي ۇلى قۇقىق قورعاۋ ورگاندارىنا شاعىمدانىپ, ءىس «ساياسي تەحنولوگتىڭ» 5 جىلعا شارتتى سوتتالۋىمەن اياقتالدى.
ەندى يمانعالي تاسماعامبەتوۆ ءبىر جىلدان كەيىن ودكب-داعى توراعالىعىن باسقا ەلدىڭ وكىلىنە تاپسىرعاننان كەيىن, «ەسكى قازاقستانداعى» ا كاتەگوريالى شەنەۋىكتەردىڭ زامانى تولىعىمەن اياقتالماق. بۋىن الماسۋ پروتسەسى بيلىكتىڭ بارلىق تارماقتارىندا ءجۇردى.
