جاڭالىقتار
«قۇجات راسىمدەپ, جۇمىسقا كىرگىزبەك بولعان»: اقتوبەلىك بلوگەر جەرلەستەرىن الداعانى ءۇشىن سوتتالدى
فوتو: pixabay.com
اقتوبەدە بلوگەر جەرلەستەرىن الداپ, قۇجات راسىمدەۋدى, جۇرگىزۋشى كۋالىگىن قالپىنا كەلتىرۋدى جانە جۇمىسقا ورنالاستىرۋدى ۋادە ەتىپ, ولاردان 257 مىڭنان ءبىر ميلليون تەڭگەگە دەيىن اقشا العان, دەپ جازدى qandastar.kz
بۇل تۋرالى Stan.kzاقپارات اگەنتتىگى حابارلايدى.
مۇعالجار اۋدانىندا ءوزىن بلوگەر ءارى قوعام قايراتكەرى رەتىندە تانىستىرعان ەر ادامعا جەرگىلىكتى تۇرعىنداردان شاعىم تۇسكەننەن كەيىن «الاياقتىق» بابىمەن قىلمىستىق ءىس قوزعالدى. تەرگەۋ بارىسىندا ونىڭ بىرنەشە ادامدى الداعانى انىقتالدى.
ءبىر جاعدايدا ول دۇكەن يەسىنە تۇنگى ساعات 23:00-دەن كەيىن دە الكوگول ساتۋ ماسەلەسىن شەشىپ بەرەمىن دەپ ۋادە بەرىپ, ءبىر ميلليون تەڭگە العان. بىراق ۋادەسىن ورىنداماعان. ال كولىك جۋاتىن ورىن يەسىنە 257 مىڭ تەڭگەگە جۇرگىزۋشى كۋالىگىن قالپىنا كەلتىرەمىن دەپ سەندىرگەن.
تاعى ءبىر ازاماتتى 450 مىڭ تەڭگەگە بالاباقشاعا جۇمىسقا ورنالاستىرامىن دەپ الداعان. سونداي-اق تەندەر ارقىلى ساياباق پەن سكۆەردى كۇتىپ-ۇستاۋ قۇقىعىن جەڭىپ العان كاسىپكەردەن كونكۋرس قۇجاتتارىنىڭ تالاپقا ساي ەمەستىگى ماسەلەسىن شەشىپ بەرەمىن دەپ تاعى ءبىر ميلليون تەڭگە العان. الاياقتىڭ كومەكتەسە المايتىنىن تۇسىنگەن جابىرلەنۋشىلەر پوليتسياعا شاعىم تۇسىرگەن.
ءىس مۇعالجار اۋداندىق سوتىندا قارالدى. ايىپتالۋشى كىناسىن تولىق مويىنداپ, ۇكىم شىعارىلعانعا دەيىن بارلىق اقشانى جابىرلەنۋشىلەرگە قايتارىپ بەرگەن. سوت شەشىمى بويىنشا ول الاياقتىق جاساعانى ءۇشىن 3 جىلعا باس بوستاندىعىن شەكتەۋ جازاسىنا كەسىلدى. جازاسىن ەركىندىكتە, بىراق بەلگىلى ءبىر شەكتەۋلەرمەن وتەيدى.
ەسكە سالايىق, بۇعان دەيىن اتىراۋدا بلوگەر رانو نىعمەتوۆا الاياقتىق جاسادى دەگەن ايىپپەن 6 جىل 5 ايعا باس بوستاندىعىنان ايىرىلعان ەدى. تەرگەۋ ونى گۇل دۇكەنىن الداپ, سونداي-اق جابىرلەنۋشىدەن اقشا العان دەپ ايىپتادى. الايدا سوتتالۋشى ءوز كىناسىن مويىنداماي, ءىستىڭ قولدان جاسالعانىن العا تارتتى.
