«Qujat rásimdep, jumysqa kirgizbek bolǵan»: Aqtóbelik bloger jerlesterin aldaǵany úshin sottaldy

Foto: pixabay.com

Aqtóbede bloger jerlesterin aldap, qujat rásimdeýdi, júrgizýshi kýáligin qalpyna keltirýdi jáne jumysqa ornalastyrýdy ýáde etip, olardan 257 myńnan bir mıllıon teńgege deıin aqsha alǵan, dep jazdy qandastar.kz

Bul týraly Stan.kzaqparat agenttigi habarlaıdy.

Muǵaljar aýdanynda ózin bloger ári qoǵam qaıratkeri retinde tanystyrǵan er adamǵa jergilikti turǵyndardan shaǵym túskennen keıin «Alaıaqtyq» babymen qylmystyq is qozǵaldy. Tergeý barysynda onyń birneshe adamdy aldaǵany anyqtaldy.

Bir jaǵdaıda ol dúken ıesine túngi saǵat 23:00-den keıin de alkogol satý máselesin sheship beremin dep ýáde berip, bir mıllıon teńge alǵan. Biraq ýádesin oryndamaǵan. Al kólik jýatyn oryn ıesine 257 myń teńgege júrgizýshi kýáligin qalpyna keltiremin dep sendirgen.

Taǵy bir azamatty 450 myń teńgege balabaqshaǵa jumysqa ornalastyramyn dep aldaǵan. Sondaı-aq tender arqyly saıabaq pen skverdi kútip-ustaý quqyǵyn jeńip alǵan kásipkerden konkýrs qujattarynyń talapqa saı emestigi máselesin sheship beremin dep taǵy bir mıllıon teńge alǵan. Alaıaqtyń kómektese almaıtynyn túsingen jábirlenýshiler polıııaǵa shaǵym túsirgen.

Is Muǵaljar aýdandyq sotynda qaraldy. Aıyptalýshy kinásin tolyq moıyndap, úkim shyǵarylǵanǵa deıin barlyq aqshany jábirlenýshilerge qaıtaryp bergen. Sot sheshimi boıynsha ol alaıaqtyq jasaǵany úshin 3 jylǵa bas bostandyǵyn shekteý jazasyna kesildi. Jazasyn erkindikte, biraq belgili bir shekteýlermen óteıdi.

Eske salaıyq, buǵan deıin Atyraýda bloger Rano Nyǵmetova alaıaqtyq jasady degen aıyppen 6 jyl 5 aıǵa bas bostandyǵynan aıyrylǵan edi. Tergeý ony gúl dúkenin aldap, sondaı-aq jábirlenýshiden aqsha alǵan dep aıyptady. Alaıda sottalýshy óz kinásin moıyndamaı, istiń qoldan jasalǵanyn alǵa tartty.