جاڭالىقتار
قۇجاتسىز قازىلعان كوتلوۆان: الماتىدا 40 قاباتتى عيماراتتىڭ قۇرىلىسى توقتاتىلدى
الماتىدا سالىنىپ جاتقان 40 قاباتتى عيماراتتىڭ قۇرىلىسى ۋاقىتشا توقتاتىلدى. قۇرىلىس كومپانيالارى قاجەتتى قۇجاتسىز, رۇقسات الماي تۇرىپ, ءىرى كولەمدە جەر قازۋ جۇمىسىن باستاعان, دەپ حابارلايدى Ertenmedia.
بۇل تۋرالى دەپۋتات باقىتجان بازاربەك مالىمدەدى. ونىڭ ايتۋىنشا, قۇرىلىس الاڭىندا جۇرگىزىلگەن رەيد بارىسىندا RAMS پەن «BRC Construction» كومپانيالارىنىڭ قۇرىلىستى جۇرگىزۋگە مەملەكەتتىك ساراپتامانىڭ وڭ قورىتىندىسى جانە قۇرىلىس-مونتاج جۇمىسىنا رۇقسات قاعازى جوق ەكەنى انىقتالعان.
«ولار تەك بۇرىنعى عيماراتتاردى بۇزۋعا عانا رۇقسات العان. بىراق بۇل كومپانيالار دەمونتاج دەگەن سىلتاۋمەن زاڭسىز تۇردە ۇلكەن شۇڭقىر قازۋدى باستاپ كەتكەن», – دەدى بازاربەك.
ەrtenmedia جازعانداي, دەپۋتات مەملەكەتتىك قۇرىلىس ينسپەكتورلارى (گاسك) كومپانيالارعا بىرنەشە رەت ەسكەرتۋ جاساعانىمەن, قۇرىلىسشىلار ونى ەلەمەي كەلگەنىن ايتادى. وسى رەيد كەزىندە RAMS كومپانياسىنىڭ باسقارۋشى ديرەكتورى تولگا مەتين باستاپقىدا قۇرىلىستى توقتاتۋ تۋرالى قۇجاتقا قول قويۋدان باس تارتقان.
«مەن وعان قۇرىلىستى توقتاتۋ تۋرالى رەسمي قۇجاتقا قول قويۋىن تالاپ ەتتىم. ارتىمدا مەملەكەتتىك ورگاندار تۇردى. اقىرى ول قۇجاتقا قول قويدى. بۇل جەرگىلىكتى حالىقتىڭ شاعىن بولسا دا جەڭىسى», – دەدى دەپۋتات.
دەگەنمەن بۇل ازىرگە قۇرىلىستىڭ ۋاقىتشا توقتاۋى عانا. الدا گاسك جۇرگىزەتىن كەشەندى تەكسەرىس كۇتىپ تۇر. عيماراتتىڭ سەيسميكالىق قاۋىپسىزدىگى, تەكتونيكالىق جارىقتار جانە جەر استى سۋلارىنىڭ جاعدايى تەكسەرىلەدى.
سونداي-اق قۇرىلىس كومپانيالارىنىڭ جەردى زاڭسىز يەمدەنگەنى دە انىقتالعان.
«جەر رەسۋرستارىن باسقارۋ دەپارتامەنتى باسشىسىنىڭ ورىنباسارى رۋسلان ەرمەنوۆ RAMS پەن «BRC Construction» كومپانيالارىنىڭ جەردى ءوز بەتىنشە باسىپ العانىن راستادى. ەندى قالالىق جەر قاتىناستارى باسقارماسى سوتقا جۇگىنىپ, جەر تەلىمدەرىن مەملەكەتكە قايتارۋعا ءتيىس», – دەپ قورىتىندىلادى دەپۋتات.
