Jańalyqtar
Qujatsyz qazylǵan kotlovan: Almatyda 40 qabatty ǵımarattyń qurylysy toqtatyldy
Almatyda salynyp jatqan 40 qabatty ǵımarattyń qurylysy ýaqytsha toqtatyldy. Qurylys kompanııalary qajetti qujatsyz, ruqsat almaı turyp, iri kólemde jer qazý jumysyn bastaǵan, dep habarlaıdy Ertenmedia.
Bul týraly depýtat Baqytjan Bazarbek málimdedi. Onyń aıtýynsha, qurylys alańynda júrgizilgen reıd barysynda RAMS pen «BRC Construction» kompanııalarynyń qurylysty júrgizýge memlekettik saraptamanyń oń qorytyndysy jáne qurylys-montaj jumysyna ruqsat qaǵazy joq ekeni anyqtalǵan.
«Olar tek burynǵy ǵımarattardy buzýǵa ǵana ruqsat alǵan. Biraq bul kompanııalar demontaj degen syltaýmen zańsyz túrde úlken shuńqyr qazýdy bastap ketken», – dedi Bazarbek.
Ertenmedia jazǵandaı, depýtat memlekettik qurylys ınspektorlary (GASK) kompanııalarǵa birneshe ret eskertý jasaǵanymen, qurylysshylar ony elemeı kelgenin aıtady. Osy reıd kezinde RAMS kompanııasynyń basqarýshy dırektory Tolga Metın bastapqyda qurylysty toqtatý týraly qujatqa qol qoıýdan bas tartqan.
«Men oǵan qurylysty toqtatý týraly resmı qujatqa qol qoıýyn talap ettim. Artymda memlekettik organdar turdy. Aqyry ol qujatqa qol qoıdy. Bul jergilikti halyqtyń shaǵyn bolsa da jeńisi», – dedi depýtat.
Degenmen bul ázirge qurylystyń ýaqytsha toqtaýy ǵana. Alda GASK júrgizetin keshendi tekseris kútip tur. Ǵımarattyń seısmıkalyq qaýipsizdigi, tektonıkalyq jaryqtar jáne jer asty sýlarynyń jaǵdaıy tekseriledi.
Sondaı-aq qurylys kompanııalarynyń jerdi zańsyz ıemdengeni de anyqtalǵan.
«Jer resýrstaryn basqarý departamenti basshysynyń orynbasary Rýslan Ermenov RAMS pen «BRC Construction» kompanııalarynyń jerdi óz betinshe basyp alǵanyn rastady. Endi qalalyq Jer qatynastary basqarmasy sotqa júginip, jer telimderin memleketke qaıtarýǵa tıis», – dep qorytyndylady depýtat.
