ءبىلىم
«قۇجاتىم جوق, مەكتەپكە بارا المايمىن»: جەلىدە بازاردا جۇمىس ىستەپ جۇرگەن 7 جاسار بالانىڭ ۆيدەوسى تارادى
الەۋمەتتىك جەلىدە تۇركىستان وبلىسى جەتىساي قالاسىندا جۇمىس ىستەپ جۇرگەن 7 جاسار بالانىڭ ۆيدەوسى تارادى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.
TikTok جەلىسىندە جاريالانعان ۆيدەودان كىشكەنتاي بالانىڭ اربامەن اۋىر زاتتاردى سۇيرەپ بارا جاتقانىن كورۋگە بولادى. ۆيدەو اۆتورى بالانى توقتاتىپ, نە ىستەپ جۇرگەن سۇرايدى. بالا اكەسىمەن بىرگە تۇراتىنىن, ءوزى 7 جاستا ەكەنىن, وزىنەن كىشكەنتاي باۋىرى بار ەكەنىن, قۇجاتى بولماعاندىقتان مەكتەپكە بارا المايتىنىن ايتادى. سونداي-اق ۆيدەونىڭ سيپاتتاماسىندا بالانىڭ اناسى جوق ەكەنى جازىلعان.
وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى اتالمىش ۆيدەوعا قاتىستى پىكىر ءبىلدىردى. كوميتەت ۆيدەوداعى بالانىڭ تۇركىستان وبلىسىنىڭ جەتىساي قالاسىندا تۇراتىنىن راستادى.
سونداي-اق كوميتەت جەلىدەگى ۆيدەودان كەيىن ەكى بالانىڭ دا ۋاقىتشا تۇرۋ ءۇشىن مامانداندىرىلعان مەكەمەگە ورنالاستىرىلعانىن حابارلادى.
«وسى جاعدايدى رەتتەۋ ءۇشىن مەملەكەتتىك ورگان بەكىتكەن الگوريتمگە سايكەس ارنايى توپ جۇمىلدىرىلعانىن حابارلايمىز. 7 جاسار بالا مەن ونىڭ باۋىرى قاۋىپسىزدىكتە. قازىرگى ۋاقىتتا قۇزىرلى ورگاندار بالالاردىڭ دەنساۋلىعىن تەكسەرىپ, قۇجاتتارىن جانە بارلىق قۇقىقتارىن قالپىنا كەلتىرۋ ماسەلەلەرىمەن اينالىسۋدا», – دەلىنگەن حابارلامادا.
بالالاردىڭ قۇقىقتارىن قورعاۋ كوميتەتى بالالاردىڭ اناسىنىڭ ءتىرى ەكەنىن مالىمدەدى.
