كۆادروبەر بولۋ كۇنا ما: ءدىني باسقارما جاۋاپ بەردى

قازاقستان مۇسىلماندارى ءدىني باسقارماسىنىڭ وكىلى ەلبەك تاسبولات ۇلى ءمۇفتياتتىڭ كۆادروبەرلەرگە قاتىستى ۇستانىمى تۋرالى ايتتى. بۇل تۋرالىqandastar.kz اقپارات پورتالى BES.media باسىلىمىنا سىلتەمە جاساپ حابارلايدى.

ءدىني باسقارما وكىلى كۆادروبەرلىكتىڭ يسلامدىق نورمالاردى بۇزۋ ەكەنىن باسا ايتتى. ونىڭ ايتۋىنشا, مۇنداي ارەكەتتەرگە شاريعاتتا تىيىم سالىنعان.

تاسبولات ۇلى كۆادروبەرلەردىڭ ارەكەتى اللانىڭ قۇراندا ايتقاندارىنا قايشى كەلەتىنىن اتاپ ءوتتى.

«اللا تاعالا قۇرانداعى «يسرا» سۇرەسىنىڭ 70-اياتىندا: «راسىندا, ءبىز ادامدى قۇرمەتتى, قاسيەتتى قىلدىق», – دەگەن. بۇل جاراتىلىستىڭ ەڭ ارداقتىسى, ەڭ ابىرويلىسى – ادام دەگەندى بىلدىرەدى. ء«ات-تين» سۇرەسىندە: ء«بىز ادامزاتتى ەڭ كەمەل ەتىپ جاراتتىق» دەلىنگەن. سىرت كەلبەتىمىز, اياقپەن ءجۇرۋىمىز – اللانىڭ بىزگە بەرگەن سىيى», – دەيدى ءمۇفتيات وكىلى.

ءدىني باسقارما وكىلى «نيسا» سۇرەسىنىڭ 119-اياتىنا سىلتەمە جاساي وتىرىپ, شايتاننىڭ مۇسىلمانداردى قالاي اداستىرۋعا تىرىساتىنىن دا اتاپ ءوتتى.

«نيسا سۇرەسىنىڭ 119-اياتىندا اللا تاعالا شايتاننىڭ ادامزاتتى «مەن ادامزاتقا اللانىڭ جاراتىلىسىن وزگەرتۋدى بۇيىرامىن» دەپ ازعىراتىنىن باياندايدى. بۇل اياتتان ءبىز كۆادروبەرلەردىڭ جانۋارلارعا ەلىكتەپ, ءدىنىمىز تىيىم سالعان ارەكەتتەردى جاسايتىنىن اڭعارامىز. بۇل اللانىڭ ادام بالاسىن قاسيەتتى ەتكەنىنە قايشى كەلەدى», – دەيدى ەلبەك تاسبولات ۇلى.

ءجۋرناليستىڭ يسلامدا مۇنى حارام دەپ ساناۋعا بولا ما دەگەن ساۋالىنا ءمۇفتيات وكىلى  “حارام ەمەس, تىيىم سالىنعان ارەكەت” دەپ جاۋاپ بەرگەن.

كۆادروبەرلەر – بەتپەردە مەن قۇيرىق كيىپ, جانۋارلاردىڭ ادەتتەرى مەن ءىس-ارەكەتتەرىن قايتالايتىن ادامدار توبى. نەگىزىنەن جاسوسىپىرىمدەر اراسىندا تانىمال. كەيبىرەۋلەر جانۋارلاردىڭ قوزعالىستارىن قايتالاۋ بۇلشىقەتتەردى دامىتاتىتىن العا تارتىپ, كۆادروبەرلىكتى سپورت تۇرىنە دە جاتقىزادى.