Qymbat Dosjan Jánibek Savelevke qatysty jaǵymdy jańalyǵyn aıtty

Belgili jýrnalıst Qymbat Dosjan belgııalyq otbasy asyrap alǵan Jánibek esimimen tanymal Murat Savelıevke qatysty tyń málimet jarııalady, dep habarlaıdy Qandastar.kz Azattyq Rýhy-na silteme jasap.

Jýrnalıst sóz basynda tyń málimet bolmaǵandyqtan búginge deıin eshnárse jarııalamaǵanyn qozǵap ótti.

«Esterińizde bolsa, 2024 jylǵy 31 qańtarda QR Qylmystyq kodeksiniń 135-baby, 3-bóligi (Kámeletke tolmaǵandar saýdasy, onyń ishinde: kámeletke tolmaǵan adamdy Qazaqstan Respýblıkasynyń sheginen tysqary jerge áketý) boıynsha Arqalyq qalasynyń Polıııa basqarmasy qylmystyq is qozǵaǵan edi, biraq, is áli sotqa jetken joq.

2025 jylǵy 9 maýsymda qabyldanǵan qaýlydan bilgenimiz: qylmystyq is boıynsha kóptegen azamattan qan úlgileri alynyp, Jánibektikimen salystyrylyp, saraptama taǵaıyndalǵan. Osy iske qatysy bolýy múmkin azamattardan jaýap alynǵan, biraq, Jánibek úshin 12 myń dollar aldy degen kúdikke ilingen adam kúdikti emes, qorǵalýǵa quqyǵy bar kýá retinde qarastyrylǵan eken.

Perzenthana men Balalar úıiniń basshylyǵy jumys barysynda jibergen salǵyrttyqqa qatysty zań aldynda jaýap berýi kerek dep oılaımyn jáne Jánibektiń ákesi bolýy múmkin degen adamnyń ulynan qan alyp, DNQ analızin jasaý kerek», — dedi Qymbat Dosjan.

Sózin jalǵaı otyryp, Jánibektiń isin marqum Sherzat isi boıynsha zańger bolǵan Meıirman Shekeev alǵanyn qozǵap ótti.

«Endi negizgi jańalyǵymyz – men Jánibektiń resmı ókili retinde Halyq zańgeri – Meıirman Qalmahanulynyń kómegine júgindim. Jalǵyz ózim kúresip, qınalyp ketkenim ras, óıtkeni, jábirlenýshiniń resmı ókili retinde is boıynsha belgili mán-jaılar týraly málimetterdi jarııalamaýǵa mindettimin.

Endigi ýaqytta bilimdi, bilikti zańgermen birlesip, kúrmeýi qıyn bul oqıǵanyń sheshimin tabamyz dep senemin. Biz ádil sheshim qabyldanǵanyn talap etemiz. Atalǵan iske qatysty resmı ári naqty málimetti meniń, Jánibektiń jáne Meıirman Qalmahanulynyń ǵana paraqshasynan bilip otyrasyzdar.

Eldegi ǵana emes, sheteldegi qazaqtarǵa da janashyr bolyp júrgen Halyq zańgeriniń usynysymdy qoldaǵanyna alǵysym sheksiz jáne aldaǵy jumysyna sáttilik tileımin!» — dedi jýrnalıst Qymbat Dosjan.