“قىرعىز اعايىنداردان كەشىرىم سۇرايمىز, بىراق بۇل – سپورت“. اقىلباي مانكەەۆ سۇحبات بەردى

باس باپكەر ويىن تارتىستى وتكەنىن جانە جىگىتىتتەردىڭ نامىسقا تىرىسقانىن ايتتى.

«ويىن سوڭعى سەكۋندتارعا دەيىن تارتىستى ءوتتى. ەكى كوماندا ءبىر-بىرىنە ساي. وزدەرىڭىز كورگەندەي, ويىننىڭ ءبىرىنشى كەزەڭىندە قىرعىز كوكپارشىلارى العا شىعىپ, ءبىزدىڭ كوكپارشىلاردىڭ مارتەبەسى ءسال تومەندەگەندەي بولعان. بىراق پسيحولوگيالىق تۇرعىدا جىگىتتەردى جىگەرلەندىرىپ وتىردىق. قانشاما جانكۇيەر بار, ەل قاراپ وتىر بۇل دوداعا. جىگىتتەردى توقتاتىپ قويىپ ايتتىق «تريبۋناعا قاراڭدار, سەندەردىڭ ارتتارىڭدا 20 ميلليون حالىق تۇر, سەندەر شابىتتانباساڭدار ەرتەڭ ەلگە ماسقارا بولامىز» دەپ. جىگىتتەر ءۇمىتتى اقتادى», – دەدى اقىلباي مانكەەۆ.

اقىلباي مانكەەۆ ءبىرىنشى كەزەڭدە ورىن العان جانجالعا قاتىستى پىكىر ءبىلدىردى. ول ەكى جاقتان دا كىنا بارىن, ونىڭ ۇستىنە كوكپار قىزۋقاندى ويىن بولعاننان سوڭ, اراگىدىك بۇنداي جاعدايلاردىڭ بولىپ تۇراتىنىن جەتكىزدى.

«باسىندا ەشتەڭە تۇسىنبەي قالدىق. نە بولىپ جاتقانىن بىلەيىك دەسەك, ەشكىم جاۋاپ بەرمەيدى. بىراق كەيىن ارا-جىگىن اجىراتتىق. ايتا بەرسەڭ, بۇل تۋرالى اڭگىمە كوپ. اتتىڭ ۇستىندە جۇرگەننەن كەيىن بۇندا ءبارى قىزۋقاندى. ەندى بۇندا ءبىزدى ۇرىسقا قاراي تارتقان سياقتى. اۋزىنان بوق اۋىز سوزدەر شىققان. تورەشىنىڭ ءوزى ەستىپ تۇر, بىراق وعان قارسى شارا قولدانبادى. ءبىزدىڭ تاراپتان دا اعاتتىق كەتتى. سول ءۇشىن قىرعىز اعايىنداردان كەشىرىم سۇرايمىز. بىراق بۇل – سپورت, ونداي نارسە بولماسا, كوكپار ما بۇل», – دەيدى اقىلباي مانكەەۆ.

قۇراما باپكەر كوكبورى ويىندارى تۋرالى دا ايتتى.

«كوكبورى مەن كوكپاردا بىزدە بولەك ەكى كوماندا جاساقتالعان. ەشبىر قۇراما مۇندا ۇتىلامىز دەپ كەلگەن جوق. ءبىزدىڭ مۇمكىندىگىمىز 50/50. دەسە دە جىگىتتەر بارىن سالاتىن بولادى, – دەدى اقىلباي مانكەەۆ.

ەسكە سالا كەتەيىك, V دۇنيەجۇزىلىك كوشپەندىلەر ويىندارىندا كوكپاردان قازاقستان ۇلتتىق قۇراماسى قوسىمشا ۋاقىتتا 5:4 ەسەبىمەن قىرعىزستان قۇراماسىن جەڭدى.