“Qyrǵyz aǵaıyndardan keshirim suraımyz, biraq bul – sport“. Aqylbaı Mankeev suhbat berdi

Bas bapker oıyn tartysty ótkenin jáne jigititterdiń namysqa tyrysqanyn aıtty.

«Oıyn sońǵy sekýndtarǵa deıin tartysty ótti. Eki komanda bir-birine saı. О́zderińiz kórgendeı, oıynnyń birinshi kezeńinde qyrǵyz kókparshylary alǵa shyǵyp, bizdiń kókparshylardyń mártebesi sál tómendegendeı bolǵan. Biraq psıhologııalyq turǵyda jigitterdi jigerlendirip otyrdyq. Qanshama jankúıer bar, el qarap otyr bul dodaǵa. Jigitterdi toqtatyp qoıyp aıttyq «trıbýnaǵa qarańdar, senderdiń arttaryńda 20 mıllıon halyq tur, sender shabyttanbasańdar erteń elge masqara bolamyz» dep. Jigitter úmitti aqtady», – dedi Aqylbaı Mankeev.

Aqylbaı Mankeev birinshi kezeńde oryn alǵan janjalǵa qatysty pikir bildirdi. Ol eki jaqtan da kiná baryn, onyń ústine kókpar qyzýqandy oıyn bolǵannan soń, aragidik bundaı jaǵdaılardyń bolyp turatynyn jetkizdi.

«Basynda eshteńe túsinbeı qaldyq. Ne bolyp jatqanyn bileıik desek, eshkim jaýap bermeıdi. Biraq keıin ara-jigin ajyrattyq. Aıta berseń, bul týraly áńgime kóp. Attyń ústinde júrgennen keıin bunda bári qyzýqandy. Endi bunda bizdi urysqa qaraı tartqan sııaqty. Aýzynan boq aýyz sózder shyqqan. Tóreshiniń ózi estip tur, biraq oǵan qarsy shara qoldanbady. Bizdiń taraptan da aǵattyq ketti. Sol úshin qyrǵyz aǵaıyndardan keshirim suraımyz. Biraq bul – sport, ondaı nárse bolmasa, kókpar ma bul», – deıdi Aqylbaı Mankeev.

Qurama bapker kókbóri oıyndary týraly da aıtty.

«Kókbóri men kókparda bizde bólek eki komanda jasaqtalǵan. Eshbir qurama munda utylamyz dep kelgen joq. Bizdiń múmkindigimiz 50/50. Dese de jigitter baryn salatyn bolady, – dedi Aqylbaı Mankeev.

Eske sala keteıik, V Dúnıejúzilik kóshpendiler oıyndarynda kókpardan Qazaqstan ulttyq quramasy qosymsha ýaqytta 5:4 esebimen Qyrǵyzstan quramasyn jeńdi.