قىرعىز باپكەرى: قازاقتاردا نامىس بولسا, جەڭىستى تويلاماس ەدى

فوتو: اشىق دەرەككوز

قىرعىزستان قۇراماسىنىڭ كوكپار جەتەكشىسى ەرلان ابدىكاپاروۆ استانادا ءوتىپ جاتقان دۇنيەجۇزىلىك كوشپەندىلەر ويىندارىنداعى فينالدىق ماتچتان كەيىنگى اسەرىن ءبولىستى, دەپ حابارلايدى qandastar.kz  Sport.akipress.org سايتىنا سىلتەمە جاساپ حابارلايدى.

قىرعىزستان مەن قازاقستان قۇرامالارى اراسىنداعى شەشۋشى كەزدەسۋ 12 قىركۇيەكتە ءوتىپ, قازاقستان قۇراماسىنىڭ 5:4 ەسەبىمەن جەڭىسىمەن اياقتالدى.

«ءبىز ادىلەتسىزدىك بولاتىنىن بىلدىك, بىراق مۇنداي دارەجەگە جەتەدى دەپ ويلاعان جوقپىز. تورەشىلەر ءبىزدى بالاعاتتاپ, پوليتسيا مەن ارنايى جاساق ويىنشىلارىمىزدى ۇرىپ-سوقتى. ماعان ءبىر ۇقك قىزمەتكەرى كەلىپ, كۋالىگىن كورسەتىپ, سۋرەتكە ءتۇسىرىپ, حالىقتار اراسىنداعى ارازدىقتى قوزدىرىپ جاتىرسىڭ دەپ قورقىتتى. قىسىم وتە قاتتى بولدى. ەسەپ 3:1 بولعان كەزدە ءبىزدى قايتادان ويناۋعا شاقىردى جانە تورەشىلەر ءادىل بولادى دەدى.

الايدا, ەكىنشى تايمدا ءبىزدى ادىلەتسىز تورەشىلىكپەن ۇتقىزدى. ءبىز قازاقستان جاعى مۇنداي ۇيىمداسپاۋشىلىق پەن ادىلەتسىزدىككە جول بەرەدى دەپ ويلامادىق. ەگەر ولاردا نامىس بولسا, وسىنداي جەڭىستى تويلاماس ەدى.

ءبىزدىڭ جىگىتتەر قولدان كەلگەننىڭ ءبارىن جاسادى. مەن ءۇشىن بۇل 12 ويىنشى – چەمپيوندار», – دەدى ەرلان ابدىكاپاروۆ.