الەم جاڭالىقتارىجاڭالىقتار
قىرعىز كوكپارشىلارى 2-3 جىلعا شەتتەتىلەدى – باس تورەشى
فوتو: اشىق دەرەككوز
5-ءشى دۇنيەجۇزىلىك كوشپەندىلەر ويىنىندا كوكپار سپورتىنداعى جايتقا بايلانىستى باس تورەشى تاستانبەك ەسەنتاەۆ ءوز ويىمەن ءبولىستى, دەپ حابارلايدى qandastar.kz Alash.KZ-كە سىلتەمە جاساپ.
«كوكپارداعى ەرەجە بۇزىلعان ءساتتى 10 مارتە قارادىق. ويىننىڭ ىشىندە قامشىمەن ۇردىق دەگەندى كورمەدىك. بىراق بۇل جايت ويىننان تىس ۋاقىتتا بولدى. قىرعىزداردىڭ باستى تالابى – ءبىزدىڭ ويىنشىنى قىزىل قاعازبەن شەتتەتۋ ەدى. بىراق ءبىزدىڭ ەرەجەدە ونداي كورسەتىلمەگەندىكتەن, 2 مينۋت الاڭنان شىعاردىق. ارى قاراي باسەكە تازا ءوتتى دەپ ويلايمىن. ەكى كوماندا دا مىقتى. تورەشىلەر تاراپىنان ەشقانداي ورەسكەل قاتەلىك بولمادى», دەيدى باس تورەشى.
انۇرانعا قۇرمەت كورسەتپەگەن, مويىندارىنا تاققان مەدەلدى شەشىپ, مىنەز كورسەتىپ كەتىپ قالعان قىرعىزدارعا ناقتى شارا قولدانىلاتىنىن اشىق ايتىپتى باس تورەشى.
«بارلىعىن حالىق كوردى. دۇرىس شەشىم قابىلداندى. نارازىلىق ماراپاتتاۋ ساتىندە دە جالعاسىپ, قىرعىز كوكپارشىلارى مەرزىمىنەن بۇرىن كەتىپ قالدى. بۇل – مادەنيەتسىزدىك. وسىنداي جايتتار ءۇشىن مىندەتتى تۇردە شارا قولدانىلادى. قىرعىز كوكپارشىلارى 2-3 جىلعا شەتتەتىلەدى نەمەسە اقشالاي ايىپپۇل سالىنادى. ناقتىسىن قازىر ايتا المايمىن», دەيدى.
ايتا كەتەيىك, كەشە ەڭ كوپ 11 مىڭ جانكۇيەر جينالعان كوكپار باسەكەسىنىڭ فينالىندا قازاقستان قۇراماسى تارتىستى كەزدەسۋدە قىرعىزستاندى 5:4 ەسەبىمەن جەڭگەن بولاتىن.
