Álem jańalyqtaryJańalyqtar
Qyrǵyz kókparshylary 2-3 jylǵa shettetiledi – bas tóreshi
Foto: ashyq derekkóz
5-shi Dúnıejúzilik kóshpendiler oıynynda kókpar sportyndaǵy jaıtqa baılanysty bas tóreshi Tastanbek Esentaev óz oıymen bólisti, dep habarlaıdy qandastar.kz Alash.KZ-ke silteme jasap.
«Kókpardaǵy ereje buzylǵan sátti 10 márte qaradyq. Oıynnyń ishinde qamshymen urdyq degendi kórmedik. Biraq bul jaıt oıynnan tys ýaqytta boldy. Qyrǵyzdardyń basty talaby – bizdiń oıynshyny qyzyl qaǵazben shettetý edi. Biraq bizdiń erejede ondaı kórsetilmegendikten, 2 mınýt alańnan shyǵardyq. Ary qaraı báseke taza ótti dep oılaımyn. Eki komanda da myqty. Tóreshiler tarapynan eshqandaı óreskel qatelik bolmady», deıdi bas tóreshi.
Ánuranǵa qurmet kórsetpegen, moıyndaryna taqqan medeldi sheship, minez kórsetip ketip qalǵan qyrǵyzdarǵa naqty shara qoldanylatynyn ashyq aıtypty bas tóreshi.
«Barlyǵyn halyq kórdi. Durys sheshim qabyldandy. Narazylyq marapattaý sátinde de jalǵasyp, qyrǵyz kókparshylary merziminen buryn ketip qaldy. Bul – mádenıetsizdik. Osyndaı jaıttar úshin mindetti túrde shara qoldanylady. Qyrǵyz kókparshylary 2-3 jylǵa shettetiledi nemese aqshalaı aıyppul salynady. Naqtysyn qazir aıta almaımyn», deıdi.
Aıta keteıik, keshe eń kóp 11 myń jankúıer jınalǵan kókpar básekesiniń fınalynda Qazaqstan quramasy tartysty kezdesýde Qyrǵyzstandy 5:4 esebimen jeńgen bolatyn.
