قىرعىز كوكپارشىلارى ماراپاتتاۋ راسىمىندە قازاقستان ءانۇرانى ورىندالماي جاتىپ كەتىپ قالدى

فوتو: KAZ.NUR.KZ/ احمەت قامشىبەك

بۇگىن, 12 قىركۇيەكتە كوكپاردان V دۇنيەجۇزىلىك كوشپەندىلەر ويىندارىنىڭ فينالىندا قازاقستان قۇراماسى قىرعىزستاندى جەڭدى. ماراپاتتاۋ راسىمىندە قىرعىز كوكپارشىلارى قازاقستان ءانۇرانى ورىندالماي جاتىپ تۇعىردان ءتۇسىپ, كەتىپ قالدى, دەپ حابارلايدى qandastar.kz KAZ.NUR.KZ سىلتەمە جاساپ.

فينالدا قازاقستان قۇراماسى قىرعىزستان كومانداسىنان 5:4 ەسەبىمەن باسىم ءتۇسىپ, التىن مەدال جەڭىپ العان ەدى. ال قىرعىز سپورتشىلارى كۇمىس جۇلدە ەنشىلەدى. ماراپاتتاۋ راسىمىندە قىرعىزستان سپورتشىلارى موينىنا تاعىلعان مەدالدى شەشىپ تاستادى. كەيىن ولار قازاقستان ءانۇرانى شىرقالماي جاتىپ كەتىپ قالدى. ايتا كەتەيىك, بۇگىن قىرعىز حالقىنىڭ ۇلتتىق سپورتى كوك بورىدەن دە فينالدىق باسەكە وتەدى. اقتىق سىندا تاعى قازاقستان مەن قىرعىزستان قۇرامالارى كەزدەسەدى. بۇل ويىن ساعات 16:30-دا باستالادى. قازىر كوشپەندىلەر ويىندارىنىڭ مەدال كەستەسىندە قازاقستان قۇراماسى 71 جۇلدەمەن (29 التىن, 17 كۇمىس, 25 قولا) كوش باستاپ تۇر. ەكىنشى ورىنعا وزبەكستان جايعاستى. بۇل قۇرامانىڭ قورجىندا 32 مەدال بار (11 التىن, 12 كۇمىس, 9 قولا). ال ۇزدىك ۇشتىكتى 40 جۇلدەمەن (10 التىن, 15 كۇمىس, 15 قولا) قىرعىزستان تۇيىندەپ تۇر.