«قىرعىزدىڭ كيىز ءۇيى تۇر»: كوشپەندىلەر ويىندارىندا نەگە وتاندىق ءونىم قويىلماعان?

فوتو: اشىق دەرەككوز

حالىقتا قىزىعۋشىلىق بار, بىراق نارىقتىڭ دامۋىنا جاعداي جاسالماعان. بۇل – وتاندىق كيىز ءۇي ءوندىرۋشى التىناي تاڭىربەرگەنوۆانىڭ پىكىرى. ول ءوزىنىڭ كيىز ءۇي ءوندىرىسىن ارنايى تەحنولوگيامەن, ءبىر ستاندارتپەن شىعارۋدى جولعا قويعان ەلدەگى جالعىز كاسىپكەر ەكەنىن ايتادى. الايدا ول مەملەكەتتىك ورگانداردىڭ ۇلتتىق ءونىمنىڭ نارىققا شىعۋىنا, ەلدەگى وسى ءونىم تۇرىنە دەگەن سۇرانىس پەن ۇسىنىستىڭ ورتاسىندا دانەكەر بولا الماي وتىرعانىنا ناليدى.

ايتۋىنشا, استانادا وندىرىسپەن تۇراقتى اينالىساتىن كاسىپورىن بولا تۇرا دۇنيەجۇزىلىك كوشپەندىلەر ويىندارىنىڭ ۇيىمداستىرۋشىلارىنان ەش تاپسىرىس تۇسپەگەن. Halyq Uni ءتىلشىسى كاسىبي كيىز ءۇي ءوندىرىسىنىڭ قالاي ءجۇرىپ جاتقانىن جانە ونىڭ نارىققا دەندەپ ەنۋىنە نە كەدەرگى بولىپ وتىرعانىن كاسىپكەردەن ءبىلدى.

التىناي تاڭىربەرگەنوۆانىڭ سوزىنشە, ەلورداداعى دۇنيەجۇزىلىك ويىندار الاڭىندا قىرعىز وندىرىسىنەن شىققان كيىز ۇيلەر مەن تەمىر كيىز ۇيلەر تۇر.

رەسمي اقپارات بويىنشا كوشپەندىلەر ويىندارىندا ەلىمىزدىڭ 20 ءوڭىرى ءۇش كيىز ۇيدەن اكەلمەك, ءسويتىپ, بارلىعى 60 كيىز ءۇي تىگىلۋگە ءتيىس. ولار قالانىڭ 4 اۋدانىندا ۇيىمداستىرىلاتىن ەتنواۋىلداردا ورنالاسپاق. بىراق ول جەرلەردە قۇرىلاتىن كيىز ۇيلەردىڭ قاي جاقتىڭ ءوندىرىسى ەكەنى بەلگىسىز. ونىڭ ۇستىنە, ساپاسى مەن بىركەلكى ستاندارتى بار-جوعى دا ايتىلماعان. ال وتاندىق ءونىم سانالاتىن ەلوردالىق وندىرىستە كەرەگە-ۋىعى مەن شاڭىراعى, بوساعاسى – ءبارىنىڭ سۇيەگى ءبىر تەحنيكادا جاسالاتىندىقتان ستاندارتى دا بىردەي.

تاڭىربەرگەنوۆانىڭ سوزىنشە, قازىر ەلىمىزدە كيىز ءۇيدى ەشكىم وندىرىسپەن شىعارمايدى. قولدان جاسايتىندار عانا كەزدەسەدى. بىراق قولدان جاسالاتىندىقتان, ءبىر ايدا ءبىر كيىز ءۇي عانا شىعارا الادى. ال بۇل ءوندىرىس ەرەكشە, 6 قوندىرعى شاڭىراقتى, كەرەگەنى, ۋىقتى بولەك شىعارا الادى.

قازىر ەلىمىزدە كەڭ قولدانىلاتىن قىرعىزستاننان اكەلىنەتىن نۇسقاسىندا كيىز ءۇي قاڭقاسى اعاشتان كەسىپ قولمەن جونىپ جاسالادى. ال وتاندىق وندىرىستە اق قايىڭدى مىناداي جالپاق جۇقا تاقتاي رەتىندە كەسىپ الىپ, ۋىق-كەرەگە سۇيەگىن 14 قابات شپوننان جاسايدى. ونىڭ ءبارى ارنايى تەحنيكادا دايىندالادى.

كەرەگە مەن ۋىق, شاڭىراقتىڭ ءبارى وسى تەحنيكالاردا بىركەلكى ولشەممەن شىعادى. تەحنيكا دەمەكشى, مۇنىڭ ءبارى قولدان جاسالعان, ەلىمىزدە باسقا ەش جەردە كەزدەسپەيتىن كيىز ءۇي جاساۋعا ارنالعان ارنايى قوندىرعى. قايىڭ شپوندارى كيىز ءۇي كولەمىنە قاراي 10-نان اسا قاباتتالىپ, بەلگىلى ءبىر تەمپەراتۋرادا جاپسىرىلادى. ودان سوڭ ول سىنبايدى ءارى ءبىر ستاندارت بولعاندىقتان, كەز كەلگەن بولشەگى وڭاي اۋىستىرىلادى.

كاسىپكەردىڭ ايتۋىنشا, وتكەن «ناۋرىز» مەرەكەسىندە قالادا بويىنشا, ءتىپتى اكىمشىلىك عيماراتىنىڭ الدىندا دا قىرعىزدىڭ كيىز ۇيلەرى تۇرعان.

ءبىز ولاردى جاقسى تانيمىز. ءوندىرىس بارىسىندا ولارمەن ارالاسامىز. مامىردا قىزىلتۋ اۋىلىنا بارىپ كەلدىك. سول جەردە قىرعىز باۋىرلارىمىزدىڭ ءوندىرىسىن كوردىك. ءبىر وتباسى ءبىر ايدا ءبىر كيىز ءۇي شىعارادى. وتە كۇردەلى, قيىن جۇمىس. ەگەر بىزگە الدىن الا «وسىنشا داناسى كەرەك» دەپ تاپسىرىس بەرسە, ءوز لوگوتيپىمىزدى شىعارىپ, استاناعا سايكەس ارلەپ, زاماناۋي ۇلگىدە جاساپ بەرەر ەدىك, – دەيدى التىناي تاڭىربەرگەنوۆا.

ونىڭ ايتۋىنشا, قازىر قول استىندا 5 ادامعا جۇمىس بەرىپ وتىر. دەگەنمەن ءوندىرىستى ۇلعايتۋعا, جۇمىسشىلارىن 100 ادامعا دەيىن جەتكىزۋگە مۇمكىندىك بار. ءبىر عانا استاناداعى 100 مەكتەپتەن تاپسىرىس تۇسسە, ونىڭ ءوزى مول تابىس. سەبەبى تەحنيكالارىنىڭ ءبىر كۇندە ءبىر كيىز ءۇي شىعارا الاتىن مۇمكىندىگى بار, سوندىقتان كەز كەلگەن كولەمدەگى تاپسىرىستى قابىلداي الاتىنىن ايتادى.