«Qyrǵyzsha án aıtpasa, ataq ne úshin berildi?»: Dımash ózin synaǵandarǵa jaýap berdi

Kesheli beri qazaqstandyq jáne qyrǵyzstandyq áleýmettik jeli qoldanýshylary Dımash Qudaıbergenge berilgen «Qyrǵyz Respýblıkasynyń Halyq ártisi» ataǵyna qatysty túrli pikir bildirip jatyr.

Ásirese, keıbir qoldanýshylar onyń qyrǵyz tilinde án aıtpaǵanyn alǵa tartyp, ataqtyń berilýin oryndy sanamaǵan. Al Dımash bul synǵa sabyrmen ári sál ázilmen jaýap berdi.

«Men heıterlerdi jaqsy kóremin, tipti keıde tym erekshe jaqsy kóremin! Solardyń arqasynda, shynymdy aıtsam, men shabyttanamyn. Jalpy, bul sózderde biraz shyndyq bar… Biraq, men ózim azdy-kópti adekvatty adam retinde, bul marapattyń tek án aıtqanym úshin nemese jurtshylyq meni tanıtyny úshin ǵana berdi dep oılamaımyn. Eń aldymen, bul – eki eldiń arasyndaǵy dostyqtyń belgisi», – dedi ol jýrnalıst suraǵyna jaýap bere otyryp.

Ánshi sonymen birge «Siz úshin Qyrǵyz Respýblıkasynyń Halyq ártisi degen ataq neni bildiredi?» degen saýalǵa da jaýap berdi.

«Osy sátti paıdalana otyryp, Prezıdent Sadyr Japarov myrzaǵa shyn júrekten alǵys aıtqym keledi. Halyq arasynda: «Ár istiń qaıyry bar» degen sóz bar (qazaqtyń maqaly). Keshe maǵan tabystalǵan marapatty men Qyrǵyz halqynyń Qazaq halqyna degen baýyrlastyq qurmetiniń belgisi retinde qabyldadym. Sondyqtan bul marapatty tek maǵan berip otyr dep aıta almaımyn. Barshańyzǵa qonaqjaılylyqtaryńyz ben iltıpattaryńyz úshin, ónerimizge, halqymyzdyń mádenıetine degen zor jáne shynaıy súıispenshilikterińiz úshin shyn júrekten alǵys aıtqym keledi», – dedi Dımash.