قىرعىزستان پرەزيدەنتى تىكۇشاقپەن ۇسىنىس جاساعان جيەنى ءۇشىن كەشىرىم سۇرادى

فوتو: kg.kabar.kg

مەملەكەت باسشىسىنىڭ تۋىسىنا 24 ماۋسىمدا ورۋ-ساي شاتقالىندا ۇسىنىس جاسالدى. وندا پرەزيدەنتتىڭ جيەنى ءوزىنىڭ سۇيىكتىسىمەن بىرگە تجم تىكۇشاعىندا ۇشىپ كەلدى.

بۇل وقيعا ەل حالقىنىڭ نارازىلىعىن تۋدىردى. «ەل باسشىلارىنىڭ تۋىستارى مەن جاقىندارى باسقالارعا ۇلگى بولۋى كەرەك, اركىمنىڭ تىكۇشاق جالداۋعا مۇمكىندىگى بولا بەرمەيدى. بۇل ءۇشىن تجم تىكۇشاقتارى ساتىپ الىندى ما? پرەزيدەنت ىسىراپشىلدىقتى توقتاتۋ كەرەكتىگىن ايتتى», – دەپ جازدى الەۋمەتتىك جەلى قولدانۋشىلارى.

«كابارعا» بەرگەن سۇحباتىندا سادىر جاپاروۆ لاززات نۋرقوجاەۆانىڭ بولاشاق جۇبايى پرەزيدەنتتىڭ ىسىراپشىلدىققا تىيىم سالۋ تۋرالى باستاماسىن قولداۋعا ءتيىس ەكەنىن ايتتى.

ء«سىز دۇرىس ايتاسىز, ەل باسشىلىعىنىڭ تۋىستارى باسقالارعا ۇلگى بولۋى كەرەك. مەن ىسىراپشىلدىقتى توقتاتۋ كەرەك دەپ بىرنەشە رەت ايتتىم. كەم دەگەندە, بولاشاق كۇيەۋ بالا بۇل باستامانى قولداپ, قوعامدى دا, ءوزىمدى دە سىناماس بۇرىن ويلانۋعا ءتيىس. مەنىڭ ويىمشا, ول مۇنى جاستىقپەن جاسادى», – دەدى پرەزيدەنت.

ول قىرعىزستان تجم جاڭا تىكۇشاقتار ساتىپ العانىن قوستى.

ء«بىز تىكۇشاقتاردى كوممەرتسيالىق ماقساتتا پايدالانۋعا رۇقسات بەردىك. ولار وزدەرىن اقتاۋى كەرەك. كەز كەلگەن ادام تىكۇشاقتاردى جالعا الا الادى, بولاشاقتا جاڭا اپپاراتتار ساتىپ الۋ ءۇشىن ءاربىر تيىن مەملەكەتتىك بيۋدجەتكە تۇسەدى. وسىلايشا, اۆياپارك ۇنەمى جاڭارتىلىپ وتىرادى «, – دەدى سادىر جاپاروۆ.

قازىرگى تاڭدا رەسپۋبليكا بويىنشا 20-عا جۋىق تىكۇشاق بار. سادىر جاپاروۆ تۋىستارىنىڭ, اعا-ىنىلەرىنىڭ, اپا-سىڭلىلەرى مەن بالالارىنىڭ الدىنا قاتاڭ تالاپتار قوياتىنىن اتاپ ءوتتى. پرەزيدەنت جيەنى ءۇشىن كەشىرىم سۇرادى.

«بۇرىن باسقالاردى سىناپ ءجۇردىم, ەندى ءوزىم دە سىنعا ۇشىرادىم. مەن حالىق الدىندا جيەنىم ءۇشىن كەشىرىم سۇرايمىن, ول ءالى جاس جانە قوعامنىڭ سىنىن كورىپ وتىر. دۇرىس قورىتىندى شىعارادى دەپ ۇمىتتەنەمىن «, – دەپ تۇيىندەدى ءوز ءسوزىن سادىر جاپاروۆ.